Italiyada qiruvchi samolyoti Ferrari bilan poyga o‘ynaydi
Italiya harbiy-dengiz kuchlari F-35B qiruvchi samolyoti va Ferrari SF90 ishtirokidagi noodatiy poygani tashkil qilmoqda. Musobaqa 11-oktabr kuni Italiyaning janubidagi Grottaglie aviabazasida o‘tkazilishi rejalashtirilgan. Bu haqda Defense News xabar berdi.
500 metrda samolyot va Ferrari to‘qnashadi
Poyganing birinchi bosqichi uzunligi 500 metr bo‘ladi. Unda F-35B va Ferrari SF90 aviabazaning samolyotlar qo‘nishi uchun ishlatiladigan alyuminiy qoplamali yo‘lakda bir vaqtda harakatlanadi. Ferrari avtomobilini yettita tezlik rekordiga ega italiyalik haydovchi Fabio Barone boshqaradi.
SF90 odatiy sozlamalarda 0 dan 100 km/soat tezlikka 2,8 soniyada chiqadi. Maxsus sozlamalardan keyin esa bu ko‘rsatkich 2,6 soniyagacha tushiriladi.
Barone 500 metrlik masofada Ferrari 330 km/soat tezlikka chiqishini va poygani taxminan 8-9 soniyada yakunlashini kutmoqda.
F-35B startda sekinroq, ammo keyin havoga ko‘tariladi
Baronening so‘zlariga ko‘ra, F-35B poyga boshida Ferrari’dan sekinroq tezlashishi mumkin, biroq qiruvchi samolyotning quvvati ancha yuqori.
500 metr tugashi bilan F-35B havoga ko‘tariladi. Shu sababli birinchi bosqichda asosiy kurash samolyot yerda tezlanayotgan paytda yuz beradi.
Poyganing ikkinchi bosqichi esa ancha uzun – 2,8 kilometr. Bu masofada Ferrari va F-35B dastlab birga harakatlanadi, 500 metrdan keyin esa qiruvchi samolyot havoga ko‘tarilib, qolgan masofani taxminan 20 metr balandlikda uchib o‘tadi.
Ferrari uchun alyuminiy yo‘lak alohida sinov bo‘ladi
Poyga o‘tkaziladigan yo‘lakning kengligi atigi 35 metrni tashkil qiladi. Mashina yuqori tezlikda alyuminiy qoplamadan harakatlanishi sababli tebranishlar paydo bo‘lishi mumkin.
Baronening aytishicha, Ferrari 330 km/soatgacha tezlashadigan sharoitda bu omil avtomobilni boshqarishni murakkablashtiradi.
Uning hisob-kitobiga ko‘ra, tezlanish vaqtida haydovchi taxminan 2,2 g yuklamaga duch keladi. Bu qariyb 140 kilogramm bosimga teng.
Italiyada bunday poyga ilk bor bo‘lmaydi
Harbiy samolyot va Ferrari o‘rtasidagi poyga Italiyada ilk bor o‘tkazilmayapti.
2003-yilda Formula-1 chempioni Mixayel Schumacher Grosseto aviabazasida Ferrari avtomobilida Italiya harbiy-havo kuchlarining Eurofighter qiruvchisi bilan poygalashgan.
O‘sha tadbirni taxminan 50 ming tomoshabin kuzatgan. Eurofighter 900 va 1 200 metrlik poygalarda g‘alaba qozongan, Schumacher esa 600 metrlik qisqa masofada 294 km/soat tezlikka chiqib, samolyotni 0,2 soniyaga ortda qoldirgan.
Yangi poygada esa Ferrari’ni boshqaradigan Barone avval ham Italiya harbiy-dengiz kuchlari bilan hamkorlik qilgan. U 2025-yilda Navy’ning «Trieste» aviatashuvchi kemasi palubasida Ferrari’ni 164 km/soat tezlikda haydagan.
Baronening aytishicha, bunday poyganing asosiy maqsadi oddiy avtomobil poygasidan farqli ravishda tomoshabinlarga noodatiy shou namoyish etishdir.
Avvalroq Ferrari’ning Luce dasturi doirasida ishlab chiqarilgan ilk avtomobil – Chassis 0 40 mln dollarga sotilgani haqida xabar berilgandi.
