Mirziyoyev va Infantino FIFA vakolatxonasining ochilishini muhokama qildi
O‘zbekiston prezidenti Shavkat Mirziyoyev 30-sentabr kuni Xalqaro futbol federatsiyasi (FIFA) prezidenti Janni Infantinoni qabul qildi. Uchrashuvda O‘zbekiston va Ozarbayjonda 2027-yilda o‘tkaziladigan U-20 futbol bo‘yicha jahon chempionatiga tayyorgarlik masalalari muhokama qilindi.
FIFA rahbari O‘zbekistondagi futbol islohotlarini e’tirof etdi
Uchrashuv avvalida Janni Infantino O‘zbekistonning futboldagi yutuqlari hamda mamlakatda sportni rivojlantirishga qaratilgan islohotlar natijalarini qayd etdi.
O‘zbekiston va Ozarbayjon 2027-yilgi FIFA U-20 Jahon chempionatiga birgalikda mezbonlik qiladi. FIFA ma’lumotlariga ko‘ra, turnir ikki mamlakatda o‘tkaziladi.
Yoshlar futbolini rivojlantirish masalalari muhokama qilindi
Tomonlar FIFA bilan futbolni ommalashtirish, ayniqsa, yoshlar orasida ushbu sport turiga qiziqishni oshirish bo‘yicha qo‘shma dasturlarni rivojlantirish masalalarini ko‘rib chiqdi.
Shuningdek, futbolni tashkil etish va boshqarish tizimini takomillashtirish, yosh iste’dodlarni aniqlash va ularning salohiyatini rivojlantirish, murabbiylar, hakamlar, menejerlar, sport shifokorlari hamda texnik mutaxassislarni xalqaro standartlar asosida tayyorlash bo‘yicha hamkorlikni kengaytirish yuzasidan fikr almashildi.
Toshkentda FIFA vakolatxonasi ochilishi muhokama qilindi
Uchrashuvda O‘zbekistonda FIFAning yirik turnirlari va tadbirlarini o‘tkazish, shuningdek, Toshkent shahrida tashkilotning mintaqaviy vakolatxonasini ochish jarayonini jadallashtirishga alohida e’tibor qaratildi.
Avvalroq Infantino 29 – 30-sentabr kunlari rasmiy tashrif bilan O‘zbekistonda bo‘lishi haqida xabar berilgandi.
