Braziliyada ishlab chiqarilishi to‘xtatilgan Chevrolet Cobalt va Prisma 2026-yilda ham ikkilamchi bozorda kundalik foydalanish uchun maqbul avtomobillar qatoriga kiritildi. NaPista ekspertlari Cobalt’da keng salon va katta yukxonani, Prisma’da esa sodda tuzilish va xizmat ko‘rsatish qulayligini asosiy ustunlik sifatida qayd etdi.
NaPista ishlab chiqarilishi to‘xtatilgan, biroq ikkilamchi bozorda hali ham amaliy tanlov bo‘lib qolayotgan 10 ta avtomobil ro‘yxatini tuzdi. Unda Chevrolet’ning ikki modeli — Cobalt va Prisma ham bor.
Cobalt — keng salon va katta yukxona uchun
Nashr Chevrolet Cobalt’ni ko‘proq joy talab qiladigan xaridorlar uchun oqilona tanlov deb atadi.
Modelning asosiy ustunligi sifatida keng salon, katta yukxona hamda 1,4 va 1,8 litrli dvigatellarning yaxshi o‘rganilgan konstruktsiyasi ko‘rsatilgan. Bu ta’mirlash va xizmat ko‘rsatish xarajatlarini oldindan hisoblashni osonlashtiradi.
Shu bilan birga, Cobalt hashamat yoki sport xarakteriga mo‘ljallanmagan. Uning asosiy vazifasi — oilaviy va kundalik foydalanishda sodda hamda amaliy avtomobil bo‘lish.
NaPista ma’lumotiga ko‘ra, Braziliya ikkilamchi bozorida 2017-yilgi 1.8 SPE/4 Eco LTZ avtomat Cobalt narxi $11,1 mingdan boshlanadi.
Benzinda uning sarfi shaharda 11,1 km/l, trassada 14,4 km/l deb ko‘rsatilgan.
Prisma ham amaliy sedan sifatida qayd etildi
Chevrolet Prisma ham ishlab chiqarishdan chiqarilganiga qaramay, sodda va tushunarli konstruktsiyasi sabab ro‘yxatga kiritilgan.
Nashrga ko‘ra, model texnik xizmat ko‘rsatish nuqtayi nazaridan yaxshi tanish, yukxonasi xetchbeklarga qaraganda kattaroq va kundalik foydalanish uchun yetarlicha qulay.
Biroq xarid qilishda avtomobilning oldingi foydalanish tarixini tekshirish muhim. Ayniqsa, taksi yoki korporativ parkda ko‘p ishlatilgan avtomobillarda eskirish yuqori bo‘lishi mumkin.
Braziliya bozorida 2017-yilgi 1.4 SPE/4 Eco LTZ Prisma narxi $11,3 mingdan boshlanishi ko‘rsatilgan. Benzinda sarfi shaharda 12,9 km/l, trassada esa 15,4 km/l ni tashkil qiladi.
Ishlab chiqarishdan chiqishi yomon avtomobil degani emas
NaPista mutaxassislari modelning ishlab chiqarilishi to‘xtatilishi uning avtomatik ravishda yomon tanlovga aylanishini anglatmasligini ta’kidlaydi.
Asosiy e’tibor avtomobilning texnik holati, xizmat ko‘rsatish tarixi, ehtiyot qismlar mavjudligi va avval qanday sharoitda ishlatilganiga qaratilishi kerak.
Eslatib o‘tamiz, avvalroq xorijda sotilmagan Chevrolet’lar O‘zbekistonga qaytarilayotgani haqidagi xabar yuzasidan UzAuto Motors izoh bergandi.
