O‘zbekiston JCh – 2034 yo‘llanmasini qo‘lga kiritishi mumkin
Osiyo futbol konfederatsiyasi (AFC) 2030-yildan boshlab Millatlar ligasini ishga tushirishni rejalashtirmoqda. Taklif qilinayotgan yangi tizim Osiyo kubogi va Jahon chempionati saralashini ham Millatlar ligasi natijalari bilan bog‘laydi. Shu sababli O‘zbekiston 2034-yilgi Jahon chempionatiga chiqish uchun yangi imkoniyatga ega bo‘lishi mumkin. Bu haqda The Asian Game xabar berdi.
Osiyoning 47 ta terma jamoasi uch divizionga bo‘linadi
Taklifga ko‘ra, AFC tarkibidagi 47 ta terma jamoa kuchiga qarab uchta divizionga ajratiladi. Birinchi va ikkinchi divizionda 18 tadan jamoa qatnashadi, qolgan 11 ta terma jamoa esa uchinchi divizionga joylashtiriladi.
O‘zbekiston 2026-yilgi Jahon chempionatiga tarixida ilk bor yo‘llanma olgani sababli yangi tizimning yuqori divizionida qatnashish uchun da’vogar jamoalar qatorida. Sports.kz ma’lumotiga ko‘ra, O‘zbekiston yuqori diviziondagi o‘rnini saqlab qolishni maqsad qilgan.
Divizionlar o‘rtasida ko‘tarilish va tushib ketish tizimi ham joriy etiladi. Har ikki yilda jamoalar o‘z natijalariga qarab yuqori yoki quyi divizionga o‘tadi.
Millatlar ligasi JCh – 2034 saralashiga ulanadi
Yangi tizimning eng muhim jihati shundaki, Millatlar ligasidagi natijalar Osiyo kubogi va Jahon chempionati saralashida ham hisobga olinadi.
Taklif etilayotgan formatda yuqori diviziondagi eng yaxshi olti terma jamoa JCh – 2034 yo‘llanmasini to‘g‘ridan to‘g‘ri qo‘lga kiritadi. 7 – 10-o‘rinlarni egallagan jamoalar esa pley-offda yana ikki yo‘llanma uchun kurashadi. Pley-offdagi uchinchi jamoaga qit’alararo pley-off orqali JChga chiqish imkoniyati berilishi ko‘zda tutilgan.
Shu sababli O‘zbekiston yuqori divizionda qatnashib, kuchli oltilikdan joy olsa, 2034-yilgi Jahon chempionatiga yo‘llanmani amalda Millatlar ligasi orqali qo‘lga kiritishi mumkin.
Tizim 2030/31-yildan to‘liq ishlaydi
AFC Millatlar ligasini bosqichma-bosqich joriy etishni rejalashtirmoqda. 2030-yilgacha bo‘lgan davr o‘tish bosqichi sifatida ishlatiladi, 2030/31-yilgi mavsumdan esa yangi tizim to‘liq kuchga kirishi kutilmoqda.
Bunda birinchi va ikkinchi diviziondagi o‘yinlar «Shveytsariya tizimi»ga o‘xshash liga formatida o‘tkaziladi. Uchinchi divizion esa uchta guruhga bo‘linadi.
AFC, shuningdek, ikki yilda bir marta yuqori divizionning eng yaxshi to‘rtta jamoasi ishtirokida final bosqichini o‘tkazishni rejalashtirmoqda.
O‘zbekiston uchun bu nimani anglatadi
O‘zbekiston 2026-yilgi Jahon chempionatida tarixida ilk bor ishtirok etganidan keyin Osiyoning kuchli terma jamoalari qatoridagi mavqeini mustahkamlashi muhim bo‘ladi.
Agar yangi format tasdiqlansa va O‘zbekiston yuqori diviziondan joy olsa, jamoaning Millatlar ligasidagi har bir natijasi nafaqat turnirdagi o‘rin, balki kelajakdagi Osiyo kubogi va JCh saralashidagi imkoniyatlariga ham ta’sir qilishi mumkin.
Hozircha bu AFC taklifi bo‘lib, yakuniy format va saralash tartibi rasman tasdiqlanmagan. 2034-yilgi Jahon chempionati esa Saudiya Arabistonida o‘tkazilishi belgilangan.
Avvalroq O‘zbekiston milliy terma jamoasi FIFA onlayn reytingida yana bir pog‘ona yuqorilab, 58-o‘rinni egallagani haqida xabar berilgandi.
