UzAuto Motors 7-oktabrdan Chevrolet Cobalt va Damas avtomobillarini to‘g‘ridan to‘g‘ri, bank ishtirokisiz bo‘lib to‘lash sharti bilan xarid qilish imkoniyatini taqdim etadi. Bu haqda kompaniya ma’lum qildi.
Taklif doirasida xaridor avtomobil uchun boshlang‘ich to‘lovni amalga oshirib, qolgan summani oyma-oy to‘lashi mumkin bo‘ladi.
Cobalt uchun 50% boshlang‘ich to‘lov
Chevrolet Cobalt xaridida boshlang‘ich to‘lov avtomobil qiymatining 50%ini tashkil etadi. Qolgan summa 24 oy davomida bo‘lib to‘lanadi. Boshlang‘ich komplektatsiya uchun oylik to‘lov 3 mln 252 ming so‘mdan boshlanadi.
Damas uchun muddat 30 oy
Chevrolet Damas uchun boshlang‘ich to‘lov 30% etib belgilangan. Qolgan mablag‘ni 30 oy davomida to‘lash mumkin. Boshlang‘ich komplektatsiya bo‘yicha oylik to‘lov 2 mln 173 ming 640 so‘mdan boshlanadi.
Bank ishtiroki talab qilinmaydi
Kompaniya ma’lumotiga ko‘ra, ushbu muddatli to‘lov dasturida bank ishtirok etmaydi. Xarid avtomobil ishlab chiqaruvchisi tomonidan taklif etilayotgan shartlar asosida amalga oshiriladi.
To‘lov miqdori tanlangan komplektatsiyaga qarab farq qilishi mumkin.
Avtomobillar soni cheklangan
UzAuto Motors taklif doirasidagi avtomobillar soni cheklanganini ma’lum qildi. Batafsil ma’lumotni Chevrolet rasmiy dilerlik markazlari yoki 78 141-77-77 telefon raqami orqali olish mumkin.
Eslatib o‘tamiz, Kursiv Uzbekistan nashri Chevrolet mashhur avtomobiliga chegirma e’lon qilgani haqida yozgan edi.
