Husiylar Saudiya Arabistoni aeroportlariga hujumlarni davom ettirdi

Yamandagi husiylar Saudiya Arabistoni aeroportlariga uchinchi kun ketma-ket raketa hujumlari uyushtirganini ma’lum qildi. So‘nggi zarbalar fonida ayrim aviakompaniyalar Ar-Riyodga parvozlarni to‘xtatdi, deb xabar berdi Kursiv Kazakhstan Reuters ma’lumotlariga tayanib.

Husiylar yetakchilari Saudiya Arabistonini uzoq davom etishi mumkin bo‘lgan mojaro haqida ogohlantirgan.

Ar-Riyod aeroportiga raketa uchirilgani aytildi

Husiylar Ar-Riyoddagi Qirol Xolid xalqaro aeroportiga ballistik raketa bilan zarba berganini bildirdi.

Saudiya Arabistoni boshchiligidagi koalitsiya esa Ar-Riyod tomon yo‘nalgan ikkita raketa va Xamis-Mushayt tomon uchirilgan yana bir raketa tutib qolinganini ma’lum qildi.

Reuters manbalariga ko‘ra, Ar-Riyod aeroportida Saudia aviakompaniyasiga tegishli samolyot yonib, jiddiy shikastlangan. Bunga tutib qolingan raketa parchalari yoki boshqa snaryad sabab bo‘lgan bo‘lishi mumkin. Dastlabki ma’lumotlarga ko‘ra, samolyot ichida yo‘lovchilar bo‘lmagan.

Shuningdek, o‘qing: Yaman husiylarga qarshi keng ko‘lamli harbiy operatsiya boshladi

Uch kishi halok bo‘lgan

Saudiya aviatsiya idoralari avvalgi Ar-Riyod va Abha aeroportlariga uyushtirilgan hujumlarda uch kishi halok bo‘lgani, yana 36 kishi jarohatlanganini bildirdi.

Abhada Marokash va Jazoir fuqarolari halok bo‘lgan, 28 kishi jarohatlangan. Ar-Riyod aeroportida esa Sudan fuqarosi vafot etgan va sakkiz kishi yaralangan.

Ayrim aviakompaniyalar reyslarni to‘xtatdi

Hujumlar fonida Lufthansa va Air India Ar-Riyodga parvozlarni vaqtincha to‘xtatgan. Cirium ma’lumotiga ko‘ra, 8-oktabr kuni soat 15:00 gacha Ar-Riyod aeroportidan amalga oshirilishi kerak bo‘lgan reyslarning qariyb yarmi bekor qilingan.

Yo‘lovchilarga aeroportga borishdan oldin parvoz holatini aviakompaniyalardan aniqlashtirish tavsiya etilgan.

Husiylar yangi zarbalar bilan tahdid qildi

Husiylar aviakompaniyalarni Saudiya Arabistoni havo hududidan foydalanish xavfli ekani haqida ogohlantirib, neft infratuzilmasiga ham yangi zarbalar berilishi mumkinligini bildirdi.

Keyinchalik guruh Ar-Riyod va Najron aeroportlariga ham hujum uyushtirganini da’vo qildi. AP bu zarbalarning natijalarini mustaqil tasdiqlay olmagan.

Mojaro nega kuchaydi

Husiylar zarbalarni Saudiya Arabistonining Yaman xalqaro tan olingan hukumatini qo‘llab-quvvatlayotgani bilan izohlamoqda.

Saudiya Arabistoni va uning ittifoqchilari Qizil dengiz sohili hamda Bob al-Mandab bo‘g‘ozi yaqinidagi husiylar nazoratidagi hududlarni qaytarib olishga urinmoqda.

Avvalroq Kursiv Uzbekistan Husiylar Aden va Ar-Riyod aeroportlariga hujum qilgani haqida yozgan edi.