Endi banklar kredit uchun kartadagi hamma pulni yechib olmaydi

2027-yil 10-yanvardan O‘zbekistonda banklar mijozning roziligisiz kredit yoki kafillik bo‘yicha to‘lovlarni undirishda uning bank kartasida mehnatga haq to‘lashning eng kam miqdorining kamida yarmiga teng pulni saqlab qolishi shart bo‘ladi. Hozirgi miqdor bo‘yicha bu 680 ming so‘mni tashkil etadi. Bu haqda Markaziy bank qarorida belgilangan.

Bank kartada qancha pul qoldirishi kerak

Yangi tartibga ko‘ra, bank mijozning roziligisiz kredit yoki kafillik majburiyatlari bo‘yicha to‘lovlarni undirish jarayonida kartadagi mablag‘ning barchasini yechib olmasligi, unda belgilangan eng kam miqdorni saqlab qolishi kerak.

2026-yil 1-sentabrdan mehnatga haq to‘lashning eng kam miqdori 1 mln 360 ming so‘m qilib belgilangan. Uning yarmi 680 ming so‘mga teng. Shu sababli, amaldagi miqdor o‘zgarmasa, yangi qoida kuchga kirganda bank mijoz kartasida kamida shuncha mablag‘ qoldirishi lozim bo‘ladi.

Yangi tartib qachondan amal qiladi

Markaziy bank boshqaruvining 2026-yil 9-oktabrda 3030-13-son bilan davlat ro‘yxatidan o‘tkazilgan qarori bank xizmatlari iste’molchilari bilan munosabatlarda tijorat banklari faoliyatiga qo‘yiladigan minimal talablarni to‘ldiradi. Hujjat 2027-yil 10-yanvardan kuchga kiradi.

Mazkur talab fuqarolar kredit qarzini undirish jarayonida kundalik zarur ehtiyojlari uchun mablag‘siz qolib ketishining oldini olish hamda bank xizmatlari iste’molchilarining huquqlarini himoya qilishga qaratilgan.

Shuni ta’kidlash kerakki, yangi qoida kredit qarzini bekor qilmaydi. U bank mijozning roziligisiz to‘lovni undirgan holatda kartada saqlanishi kerak bo‘lgan eng kam mablag‘ miqdorini belgilaydi.

Avvalroq Raqobat qo‘mitasi kredit bo‘yicha oylik to‘lovdan ortiqcha to‘langan mablag‘larni asosiy qarzni kamaytirishga yo‘naltirish mexanizmini qayta ko‘rib chiqishni taklif qilgandi.