World Chess portali o‘zbekistonlik grossmeyster Javohir Sindarov va amaldagi jahon chempioni Gukesh Dommarajuning jahon chempionligi uchun bo‘ladigan o‘yinga tayyorgarligini taqqosladi.
Nashrga ko‘ra, Sindarov hal qiluvchi bahs oldidan musobaqalardan butunlay voz kechmoqchi emas. U Sent-Luisda o‘tkaziladigan Clutch Chess turnirida qatnashadi. Unda Hikaru Nakamura, Fabiano Karuana va Praggnanandhaa kabi kuchli grossmeysterlar ham ishtirok etadi.
Sindarov kuchli raqiblar bilan o‘ynashda davom etadi
World Chess ta’kidlashicha, bu Sindarovga jahon chempionligi uchun birinchi partiyaga bir oydan kam vaqt qolganida yana yuqori darajadagi raqobat muhitida o‘ynash imkonini beradi.
«Bu da’vogar birinchi partiyaga bir oydan kam vaqt qolganida yana elita darajasidagi raqobatga qaytishini anglatadi», — deyiladi nashr materialida.
Clutch Chess rapid formatida o‘tkaziladi. Shu sababli portal bu turnir Sindarovning klassik bahs uchun tayyorlagan debyut rejalarini to‘liq ochib bermaydi, deb hisoblaydi.
Gukesh esa raqibini o‘rganishga ko‘proq vaqt oladi
Nashrga ko‘ra, Gukesh Sindarovdan farqli ravishda uzoqroq tayyorgarlik davriga ega bo‘ladi va asosiy e’tiborini bo‘lajak raqibini tahlil qilishga qaratishi mumkin.
World Chess bu ikki shaxmatchining yondashuvi turlicha ekanini qayd etadi: Sindarov amaliy o‘yin ritmini saqlab qolmoqda, Gukesh esa maxsus tayyorgarlik uchun ko‘proq vaqt olmoqda.
Sindarov Olimpiadani mag‘lubiyatsiz yakunlagan
Portal Sindarovning so‘nggi formasi ham e’tiborga loyiqligini qayd etdi.
O‘zbekistonlik grossmeyster Shaxmat Olimpiadasida birorta ham partiyada mag‘lub bo‘lmagan va O‘zbekiston terma jamoasining oltin medal olishiga yordam bergan.
Gukesh esa dastlabki o‘nta partiyaning yettitasida g‘alaba qozongan, biroq turnirni vengriyalik grossmeyster Gleb Dudin bilan o‘yindagi mag‘lubiyat bilan yakunlagan.
Birinchi partiya 24-noyabrda bo‘ladi
World Chess alohida turnirlardagi natijalar jahon chempionligi uchun bahs natijasini oldindan aniq aytib berishga yetarli emasligini ham ta’kidladi.
Sindarov va Gukesh o‘rtasidagi jahon chempionligi uchun uchrashuvning birinchi partiyasi 24-noyabr kuni Jenevada o‘tkazilishi rejalashtirilgan.
Raqiblar 14 tagacha klassik partiya o‘tkazadi. Muddatidan oldin g‘alaba qozonish uchun shaxmatchilardan biri 7,5 ochko jamg‘arishi kerak.
Eslatib o‘tamiz, Kursiv Uzbekistan nashri jahon chempionligi matchi taqvimi e’lon qilingani haqida yozgan edi.
