O‘zbekistonda soliqlarni ixtiyoriy to‘lash darajasi 89 foizni tashkil qildi

2026-yilning yanvar – sentabr oylarida O‘zbekistonda yuridik va jismoniy shaxslar tomonidan soliqlarni ixtiyoriy bajarish darajasi 89% ni tashkil etdi. Bu haqda Soliq qo‘mitasi ma’lum qildi.

Eng yuqori ko‘rsatkich yirik soliq to‘lovchilar bo‘yicha hududlararo soliq inspeksiyasida qayd etilib, 96% ni tashkil qilgan.

Toshkent shahrida ko‘rsatkich 94% ga yetdi

Hududlar kesimida Toshkent shahrida soliqlarni ixtiyoriy to‘lash darajasi 94% ni tashkil etdi.

Qoraqalpog‘iston Respublikasi va Toshkent viloyatida bu ko‘rsatkich 91%, Samarqand viloyatida esa 90% bo‘lgan.

Yer qa’ridan foydalanuvchilar soliqlarni to‘liq bajargan

Soliq turlari bo‘yicha eng yuqori natija yer qa’ridan foydalanganlik uchun soliqda qayd etildi – majburiyatlarning ixtiyoriy bajarilish darajasi 100% ni tashkil qildi.

Jismoniy shaxslardan olinadigan daromad solig‘ida bu ko‘rsatkich 97%, foyda solig‘ida 96%, aksiz solig‘ida 95% bo‘lgan.

QQS bo‘yicha ixtiyoriy to‘lov darajasi 92%, aylanmadan olinadigan soliqda 91%, mol-mulk solig‘ida 88%, yer solig‘ida esa 86% ni tashkil qilgan.

Eng past ko‘rsatkich suv resurslaridan foydalanganlik uchun soliqda qayd etilib, 60% bo‘lgan.

Avvalroq Kursiv Uzbekistan 2026-yil sentabr oyida «korxonabay» ishlash tizimi doirasida budjetga 10,8 trln so‘m soliq tushumlari ta’minlangani haqida yozgandi. Bu o‘tgan yilning mos davridagiga nisbatan 42,9% ga ko‘p.

Shuningdek, bir oyda 1 mln so‘m va undan ortiq QQS to‘lagan soliq to‘lovchilar soni 82,4 mingtaga yetib, 98,1% ga oshgani ma’lum qilingan.