Raqobatni rivojlantirish va isteʼmolchilar huquqlarini himoya qilish qoʻmitasi birja auktsionlarida AI-80 benzin sotib olishga joriy qilingan cheklov haqidagi maʼlumotlarga izoh berdi.
Avvalroq internetda Raqobat qo‘mitasi AI-80 benzinini kuniga o‘n tonnagacha sotishni cheklagani haqida xabarlar tarqalgan edi. Ayrim OAVlar bu yoqilg‘i quyish shoxobchalarida narxlarning keskin oshishiga olib kelishini yozgan.
Qoʻmita limit haqidagi maʼlumotni rad etib, birjada benzinning 80 foizi bir tonnalik lotlarda, qolgani vagon normasida (60 va 55 tn) sotilayotganini taʼkidladi.
Qoʻmitasi maʼlumotlariga koʻra, oktabr oyida 3,2 ming tonnaga yaqin mahsulot ishlab chiqarilgan, bu avgust oyiga nisbatan 14 foizga koʻpdir.
Yoz oxirida, mavsumiy talab va yuqori narxlarning o‘zgaruvchanligi davrida bozordagi narxlarni barqarorlashtirish maqsadida qo‘mita mahsulot xarid qilishning maksimal hajmini besh tonna qilib belgiladi. Ishlab chiqarish hajmining oshishi va limitning joriy etilishi narxlarni 10 foizga pasaytirishga va sentyabr oyi oxiri va oktyabr oyining birinchi yarmida birja savdolarida ularni barqarorlashtirishga yordam berdi.
«Ushbularni inobatga olgan holda, shuningdek jahon bozorlaridagi yuzaga kelgan salbiy tendensiyalardan (neft narxlarining oshishi, benzin eksportiga o‘rnatilgan cheklovlar) kelib chiqib import narxlarining ichki bozorga ta’sirini yumshatish maqsadida 17-oktyabrdan mahsulot xarid qilinishining maksimal miqdori 10 tngacha oshirildi», – deya ta’kidladi qo’mita.
Bugungi kunda respublikada 2 mingdan ortiq yoqilg‘i quyish shoxobchalari mavjud bo‘lib, ularning 99 foizida AI-80 rusumli benzin o‘rtacha 6,8 ming so‘mdan sotilmoqda.
Qo‘mita, shuningdek, hozirda neft mahsulotlari ishlab chiqarishni ko‘paytirish bo‘yicha ishlar olib borilayotganini ma’lum qildi.
«Bugungi kunda benzin bilan ta’minlash masalalarida ajiotajga sabab bo‘ladigan omillar mavjud emasligini ma’lum qilamiz», — deya xulosa qildi qoʻmita.
