Oliy Majlis Qonunchilik palatasi ikkinchi o‘qishda mamlakatning majoritar emas, balki aralash saylov tizimiga o‘tish to‘g‘risidagi hujjatni qabul qildi, deya xabar bermoqda hokimiyat sayti.
Hujjatda Oliy Majlis palatasi deputatlari saylovini aralash tizim: ham majoritar, ham proporsional tizim asosida tashkil etish nazarda tutilgan.
Palata matbuot xizmati mazkur hujjat Oliy Majlis deputatlari o‘rtasida qizg‘in muhokamaga sabab bo‘lganini qayd etdi. Bir necha yig‘ilishlarda deputatlar qonun loyihasining «har bir bandini» ko‘rib chiqdilar. Unga bir qator tashabbuslar kiritildi va normalarning takrorlanishiga barham berildi.
Yangiliklarga ko‘ra, organ deputatlarining yarmi majoritar, ikkinchisi proporsional tizim bo‘yicha saylanadi. Ya’ni, birinchi holatda O‘zbekiston fuqarolari bir mandatli okrug bo‘yicha aniq nomzodga ovoz beradi, ikkinchisida – palata a’zolari partiya ro‘yxati bo‘yicha saylanadi.
Bundan tashqari, yangi hujjatga ko‘ra, ro‘yxatdagi besh nomzoddan ikkitasi ayol bo‘lishi kerak. Ushbu qoida gender tengligini ta’minlash maqsadida qabul qilingan.
Qonun kuchga kirishi uchun u Oliy Majlis Senati tomonidan ma’qullanishi, keyin esa O‘zbekiston Prezidenti tomonidan imzolanishi kerak.
Shuningdek, deputatlar yettita qonun va respublika Saylov kodeksiga tegishli o‘zgartishlar kiritishi kerak.
«Kursiv» mart oyida aralash saylov tizimiga o‘tish tashabbusi davlat rahbari Shavkat Mirziyoyev tomonidan ilgari surilganini yozdi. Bu mamlakat siyosiy tizimida partiyalarning rolini oshirishga xizmat qilishi kutilmoqda.
Aralash saylov tizimi G‘arbiy Yevropa mamlakatlari, Avstraliya, Meksika, Yaponiya, shuningdek, Armaniston va Qirg‘izistonda amalda qo‘llaniladi.
