Falastinning HAMAS harakati bilan urush Isroilga 198 milliard shekel (53 milliard dollar) zarar keltirdi. Bu mablag‘ning yarmi mudofaaga sarflangan, deb yozadi Bloomberg mamlakat Markaziy banki ma’lumotlariga tayanib.
Milliy valyutani qo’llab-quvvatlash uchun Isroil moliya bozori regulyatori foiz stavkalarini pasaytirishdan bosh tortishga qaror qildi va ularni bir xil darajada ushlab turadi. Mamlakat rasmiylari kelgusi yillar uchun iqtisodiy o’sish prognozlarini ham pasaytirdi. Yalpi ichki mahsulot 2023- va 2024-yillarda 2 foizga o’sishi kutilmoqda. Ilgari bu ko‘rsatkich 2,3% va 2,8% deb baholangan edi.
Isroil Markaziy banki rahbari Amir Yaron harbiy mojaro oqibatlari oʻrta muddatli istiqbolda mamlakat iqtisodiyotiga taʼsir qilishini aytib, hukumatni yangi byudjetni ishlab chiqishda ehtiyotkor boʻlishga chaqirdi.
«Hukumat uzoq muddatli xarakterdagi yangi xarajatlar sonini kamaytirishi muhim», — deya Yaronning soʻzlarini keltirgan nashrda. U bu yondashuvni «mas’uliyatli byudjet tuzilmasini saqlab qolish» deb atadi.
Falastinning HAMAS guruhi va Isroil o‘rtasidagi mojaro oktabr oyi boshida avj oldi. Keyin HAMAS jangarilari yahudiy davlati hududiga bostirib kirib, Isroil fuqarolarini o‘ldirib, asirlarni, jumladan, xorijiy davlatlar vakillarini ham garovga oldi.
Isroil bunga javoban «Temir qilichlar» operatsiyasi boshlanganini e’lon qildi. G‘azo sektori hududiga havo zarbalari berildi, quruqlikdagi jangovar harakatlar ham amalga oshirildi.
«Kursiv» noyabr oyining uchinchi o‘n kunligida HAMAS tomonidan garovga olinganlarning bir qismi ozod etilgani ma’lum bo‘lgani haqida yozgan edi.
