Ozarbayjonda O‘zbekiston savdo uyi ochildi
Ozarbayjonning Boku shahrida O‘zbekiston savdo uyi ochildi, deb xabar berdi «O‘zcharmsanoat» uyushmasi matbuot xizmati.
Ochilish marosimida «O‘zcharmsanoat» aksiyadorlik jamiyati va uyushma tarkibiga kiruvchi korxonalar vakillari ishtirok etdi.
Savdo uyida charm-poyabzal, to‘qimachilik, kimyo, qurilish sanoati mahsulotlari namoyish etilmoqda.
O‘zbekiston Respublikasining Ozarbayjondagi elchisi Baxrom Ashrafxonov olti yil davomida ikki davlat o‘rtasidagi tovar ayirboshlash hajmi to‘qqiz barobar oshganini ta’kidladi.
– Bugun O‘zbekistonda tadbirkorlik va sarmoya kiritish uchun eng qulay sharoitlar yaratilgan, men nafaqat mamlakat iqtisodiyotini liberallashtirish bo‘yicha ko‘rilayotgan qadamlarni, balki o‘zbek xalqining mashaqqatli mehnatini ham nazarda tutyapman, – deydi savdo uyi rahbari Ramin Sharifov.
Avvalroq, «Kursiv» Dog‘istonda savdo uyi ochishni rejalashtirayotgani haqida yozgan edi.
