Hindiston bolalar uchun yo‘tal siropi ishlab chiqaruvchilar ustidan nazoratni kuchaytirdi

Hindiston rasmiylari to‘rt yoshgacha bo‘lgan bolalar uchun yo‘tal siroplaridan foydalanishni taqiqladi, deb xabar berdi Reuters. Bundan tashqari, mamlakatdagi farmatsevtika kompaniyalari qadoqlashda buni ko’rsatishi kerak.

Shuningdek, joriy yilning iyun oyidan boshlab Hindiston regulyatori yo‘tal siroplarini majburiy sinovdan o‘tkazishni joriy qildi va dori ishlab chiqaruvchilar ustidan nazoratni kuchaytirdi.

Mamlakat rasmiylari O‘zbekiston, Gambiya va Kamerunda 141 nafar bolaning hind siroplari tufayli halok bo‘lgani haqidagi xabarlardan so‘ng shunday choralar ko‘rdi.

Bu holatlar ushbu davlatdan dori-darmonlarni eksport qilishga salbiy ta’sir ko’rsatdi. Hindiston ko’pincha hayotni saqlaydigan dori-darmonlarni arzon narxlarda etkazib beradigan «dunyo dorixonasi» deb ataladi.

Eslatib o‘tamiz, O‘zbekistonda Doc-1 Max tufayli 65 nafar bola halok bo‘lgan edi. Dori Hindistonning Marion Biotech farmatsevtika kompaniyasi tomonidan ishlab chiqarilgan. Reuters agentligi ma’lumotiga ko‘ra, dori tarkibiga odamlar uchun zaharli bo‘lgan texnik propilen glikol qo‘shilgan.

Avvalroq, «Kursiv» O‘zbekiston Doc-1 Max siropi bo‘yicha ishni ko‘rib chiqishni vaqtincha to‘xtatgani haqida yozgan edi.