Mirziyoyev Oʻzbekiston xalqini Ramazon hayiti bilan tabrikladi
Prezident Shavkat Mirziyoyev O‘zbekiston xalqi, xorijdagi vatandoshlar va musulmonlarni Ramazon hayiti bilan tabrikladi, deb xabar qildi davlat rahbari matbuot xizmati.
– «Hammamizga ayonki, islom dini – tinchlik, ezgulik va insonparvarlik dinidir. Muqaddas kitoblarimizda «Tinchlik-omonlik, o‘zaro do‘stlik va ahillikka intilib yashash – chin mo‘minga xos fazilatdir», deb ta’kidlangani ham bu fikrni tasdiqlaydi. Bu yilgi Ramazoni sharif kunlarida ana shu qadriyatlar hayotimizda yanada yorqin namoyon bo‘ldi. Mamlakatimizda olib borilayotgan keng ko‘lamli islohotlar dinimizning asl mohiyati bilan, uning olijanob g‘oya va tushunchalari bilan uyg‘un va mushtarak ekanini barchamiz yana bir bor chuqur his etdik», – dedi davlatimiz rahbari.
Mirziyoyev respublikada mamlakatimizdagi barcha millat va din vakillarining vijdon va diniy e’tiqod erkinligini ta’minlash, ularning tili, madaniyati va an’analarini rivojlantirish uchun sharoit yaratilayotganini qo‘shimcha qildi.
Mamlakatimizda yangi masjidlar barpo etilmoqda, mutafakkirlar va olimlar ziyoratgohlari obodonlashtirilmoqda. Shuningdek, O‘zbekistonda milliy va diniy qadriyatlar tiklanib, Haj va Umra ziyoratlarini ado etish uchun imkoniyatlar ochilmoqda. Prezidentimiz bu boradagi ishlar davom etishini ta’kidladi.
– «Ayni vaqtda yoshlarimizni azaliy qadriyatlarimiz bilan birga zamonaviy bilim va kasb-hunarlarni puxta egallagan, Vatan tuprog‘ini ko‘ziga to‘tiyo qilib yashaydigan insonlar etib tarbiyalash asosiy burchimiz ekanini doimo yodda tutishimiz lozim. Jumladan, «Ezgulik – shiorimiz, ma’rifat – qurolimiz» degan shior asosida ta’lim maskanlari va mahallalarda olib borilayotgan tarbiyaviy ishlarni kuchaytirishimiz kerak», – dedi Mirziyoyev.
Davlatimiz rahbari haj va umra ziyoratlarini ado etgan yurtdoshlarimiz tashabbusini ham qo‘llab-quvvatlab, «yetilik» va mahalla faollari bilan birgalikda ma’rifiy ishlarda ishtirok etish istagini bildirdi.
Avvalroq «Kursiv» Shavkat Mirziyoyev va Turkiya prezidenti Rajab Toyyib Erdo‘g‘on bir-birini Ramazon hayiti bilan tabriklagani haqida yozgan edi.
