Chirchiq texnoparkida o‘ndan ortiq loyiha ishga tushiriladi
Chirchiq texnoparkida 2024-yilning birinchi yarmida 14 ta korxona ishga tushiriladi, deb yozadi «TASS» agentligi «Ximgrad» bosh direktori Ayrat Gizzatullinga tayanib.
Chirchiq texnoparki Tataristonning Ximgrad texnopolis ko‘magida 2022-yil bahorida Toshkent viloyatining Chirchiq shahrida tashkil etilgan. Bugungi kunda Chirchiq shahrida yettita korxona faoliyat yuritmoqda.
G‘izzatullinning qo‘shimcha qilishicha, 2023-yilda Chirchiq shahrida joylashgan korxonalar o‘z mahsulotlarining qariyb 30 foizini xorijga yetkazib berishgan.
Ximgrad O‘zbekistonda Jizzax texnoparkini ham ishga tushirdi. Uning rezidentlari polimerlarni qayta ishlash va to‘qimachilik sanoati uchun kimyoviy mahsulotlar ishlab chiqarish bilan shug‘ullanishadi.
Aytish joizki, tataristonlik investorlar «Navoiy» erkin iqtisodiy zonasida sanoat maydonchasini ishga tushirishni rejalashtirmoqda.
Avvalroq «Kursiv» 2023-yilda O‘zbekiston va Tatariston o‘rtasidagi tovar ayirboshlash hajmi 27 foizga oshib, $370 mln yetganini e’lon qilgan edi.
