BYD O‘zbekiston avtomobil bozorining yarmini egallashni rejalashtirmoqda
O‘zbekistondagi BYD zavodi yengil avtomobillar ishlab chiqarish bo‘yicha mamlakat bozorining kamida yarmini egallashni rejalashtirmoqda. Bu haqda BYD Uzbekistan Factory moliyaviy direktori Diyor Muxamedov Toshkentdagi «Innoprom» ko‘rgazmasida «Kursiv»ning savoliga javob berdi.
«Biz joriy yilning iyun oyida ishlab chiqarishni yo‘lga qo‘ymoqchimiz. Joriy yilda 10 ming dona avtomobil ishlab chiqarishni rejalashtirganmiz, kelasi yili esa 50 mingtaga yetamiz», dedi kompaniya vakili.
Keyinchalik zavod avtomobillar sonini 500 mingtaga yetkazishni maqsad qilgan, biroq kompaniya bu ko‘rsatkichga 2026-yildan oldin erisha olmaydi. Zavodning hozirgi quvvati bunga imkon bermaydi, dedi Muxamedov.
«Shuning uchun mavjud zavod modernizatsiya qilinadi yoki yangisi quriladi. Hozircha yakuniy qaror yoki kontseptsiya yo‘q, lekin menimcha, 2026 yoki 2027 yildan boshlab biz 500 ming avtomobil hajmiga erishamiz», dedi u.
BYD ishlab chiqarishni shu darajaga yetkazish rejasi O‘zbekiston prezidenti Shavkat Mirziyoyevning investitsiya shartnomasini tasdiqlash to‘g‘risidagi qarorida belgilab qo‘yilgan.
Muxamedovning qo‘shimcha qilishicha, kelasi yili BYDning O‘zbekistondagi bozor ulushi 50 mingta avtomobil bilan 20 foizdan kam bo‘ladi va u 500 mingga yetganda, tashkilot bozorning kamida yarmini egallashni rejalashtirmoqda, dedi u.
BYD vakili infratuzilma haqida ham gapirdi.
«Hozircha kompaniya kontseptsiyasida o‘z quvvatlantirish stansiyalarini ishlab chiqarish rejalari yo‘q, ammo kelajakda biz bu masalani ko‘rib chiqamiz. Endi birinchi vazifa – zavodni ishga tushirish va mahalliylashtirishni 60 foizga yetkazish. Ayrim ehtiyot qismlarni mahalliylashtirish bo‘yicha zavodlari bo‘lgan mahalliy kompaniyalar bilan ishlayapmiz», dedi Muxamedov.
«Innoprom» koʻrgazmasida Oʻzbekiston Transport vazirligi loyiha rahbari Nodir Xudayberdiyevning maʼlum qilishicha, hozir OʻzRda 200 ga yaqin quvvatlantirish stansiyalari mavjud. Yengil avtomobillarning umumiy sonida elektr transport vositalarining ulushi 1,3 foizni tashkil etadi.
Respublikada 2025-yilgacha quvvatlantirish stansiyalari sonini 2,5 mingtaga yetkazish rejalashtirilgan.
Eslatib oʻtamiz, 2022-yil 29-dekabrda «Oʻzavtosanoat» va BYD Europe B.V. (Niderlandiya) BYD Uzbekistan Factory qoʻshma korxonasini tashkil qilgan edi. Birinchi tashkilot 60% ulushga, ikkinchisi esa 40% ga ega.
2023-yil sentyabr oyida O‘zR hukumati va investor o‘rtasida loyihani amalga oshirish bo‘yicha kelishuv imzolangan edi. Hujjatdan maʼlum boʻlishicha, dasturni amalga oshirish jarayonida $160 million investitsiyalar, shundan $60 million toʻgʻridan-toʻgʻri xorijiy investitsiyalar jalb etiladi.
Avvalroq «Kursiv» ADM Jizzax zavodi O‘zbekiston avtomobil bozorining 25 foizini egallash niyatida ekanini yozgan edi. Zavod hozirda «Haval», «Chery» va «Kia» avtomobillarini ishlab chiqarmoqda.
