Umumiy qiymati 10 mlrd so‘mdan ortiq qurilish loyihalari loyiha ofisi tomonidan ko‘rib chiqiladi

Umumiy qiymati 10 mlrd so‘mdan ortiq bo‘lgan qurilish va rekonstruksiya ishlari loyiha ofisi tomonidan ko‘rib chiqiladi. Bu haqdagi qaror O‘zbekiston prezidenti Shavkat Mirziyoyev tomonidan imzolangan.

Yangi tashkilot davlat dasturlariga kiritiladigan alohida binolarni qurish va modernizatsiya qilish bo‘yicha loyiha hujjatlarini ham ko‘rib chiqadi.

Hujjatlarni ko‘rib chiqish va tasdiqlash uchun loyiha ofisi «Shaffof qurilish» platformasidan foydalanadi. Ushbu xizmatlar uchun ofis quriladigan mulkning taxminiy qiymatining 0,005% miqdorida haq oladi.

Tashkilot loyihalarni baholashga o‘zbekistonlik va xorijiy ekspertlarni jalb qilishi mumkin.

Tajriba tariqasida 2025-yildan boshlab xususiy mulkdorlarga bolalar bog‘chalari, maktablar va tibbiyot muassasalarini byudjet mablag‘lari hisobidan autsorsing asosida qurish va ta’mirlashga ruxsat beriladi.

2026-yildan boshlab xususiy kompaniyalar davlat sirlariga aloqador bo‘lmagan obyektlarni qurish va rekonstruksiya qilish imkoniyatiga ega bo‘ladi.

Avvalroq «Kursiv» O‘zbekistonning har bir viloyatida tadbirkorlarga yordam berish uchun loyiha ofislari tashkil etilishini yozgan edi.