Xitoy kompaniyasi O‘zbekistonda birinchi chiqindilarni yoqish zavodini quradi

O‘zbekistonda birinchi chiqindilarni yoqish zavodini qurish rejalashtirilgan. Ekologiya vaziri Aziz Abduhakimov va Xitoyning «CAMC Engineering» kompaniyasi raisi Van Bo bu borada kelishib oldilar, deya xabar beradi Ekologiya, atrof-muhitni muhofaza qilish va iqlim oʻzgarishi vazirligi.

Uchrashuvda O‘zbekistonda chiqindilarni yoqish elektr stansiyasi loyihasi bo‘yicha hamkorlik memorandumi imzolandi. Tomonlar chiqindilar bilan bog‘liq ishlarni o‘rganish va tashkil etish uchun ekspert guruhini yuborishga kelishib olishdi. Shuningdek, Xitoy tomoni O‘zR rahbariyatiga taqdim etish uchun zavodning dastlabki loyihasini ishlab chiqadi.

«Xitoy tomoni chiqindilarni boshqarish tizimini takomillashtirish va atrof-muhitni muhofaza qilish sanoatini rivojlantirish bo‘yicha rejalar potensial hamkorlar va investorlar uchun aniq belgilab berilganini qayd etdi», deyiladi vazirlik bayonotida.

Avvalroq «Kursiv» O‘zbekistonda chiqindi maydonlarini tartibga solish va qayta ishlash bo‘yicha yangi tizim joriy etilishini yozgan edi.