Joriy yilning 1-may holatiga koʻra, Oʻzbekistonda muammoli kreditlarning (NPL) ulushi 4,8 foizga yetdi. Markaziy bank statistikasiga koʻra, oʻtgan oyda bu koʻrsatkich 4,5 foizni tashkil qilgan edi.
Regulyator ma’lumotlariga koʻra, bir oy davomida bu koʻrsatkich pul koʻrinishida 21,6 trillion soʻmdan 23,3 trillion soʻmgacha oshgan.
Shundan 17,8 trln soʻmi davlat ulushi boʻlgan banklar hissasiga toʻgʻri keldi. Portfeldagi muammoli kreditlarning eng katta miqdori NBU (4,2 trillion so‘m), shuningdek, «Biznesni rivojlantirish banki» (3,1 trillion) va «O‘zsanoatqurilishbank»ga (deyarli 3 trillion) tegishli. Biroq, bu uchtasining eng katta muammosi «Biznesni rivojlantirish banki» bilan bog’liq bo’lib, uning portfelidagi umidsiz kreditlar ulushi 15% ni tashkil qiladi. Ushbu moliya instituti bank tizimi bo’yicha o’rtacha ko’rsatkichdan (4,8%) sezilarli darajada yuqori ulushga ega. Taqqoslash uchun: «O‘zmilliybankning» NPL ulushi o‘rtachadan pastroq (4,2%), «O‘zsanoatqurilishbank»da esa biroz yuqoriroq – 5,1%.
Respublikaning xususiy banklari o’rtasidagi NPL hajmi 5,5 trillion so’mni tashkil etadi. Muammoli kreditlarning eng yuqori koʻrsatkichi «Ipoteka-bank»da – 3,2 trillion soʻm. Keyingi o‘rinlarda «Kapitalbank» va «Hamkorbank» – mos ravishda 731 milliard va 258 milliard so‘m. Biroq, uchta moliya institutidan faqat birinchisi o’z portfelidagi NPL ulushi bank tizimi o’rtacha ko’rsatkichdan yuqori – 8,9%. Keyingi ikkitasi uchun bu ko’rsatkich mos ravishda atigi 2,6 va 1,5% ni tashkil qiladi.
Eslatib oʻtamiz, Kursiv Research Oʻzbekiston banklarining 2023-yilgi faoliyati reytingi ustida ishlamoqda. Yaqin kunlarda ushbu materialning e’lon qilinishi kutilmoqda.
Avvalroq «Kursiv» Oʻzbekiston banklari respublikadagi valyuta kursining yuqori oʻzgaruvchanligidan xavotirda ekani haqida xabar bergan edi.
