![](https://cdn-uz.kursiv.media/wp-content/uploads/2024/06/1717908781396_img20240609095232369-1024x606.webp)
Oʻzbekiston va Saudiya Arabistoni Ar-Riyod va Jidda shaharlarida Oʻzbekiston madaniyati kunlarini oʻtkazish boʻyicha muzokaralar olib bormoqda. Bu haqda «Dunyo» axborot agentligi xabar berdi.
Bu masalani Oʻzbekiston elchisi Nodirjon Turgʻunov Saudiya Arabistoni madaniyat vazirining xalqaro aloqalar boʻyicha oʻrinbosari Fahd Al-Kanan bilan muhokama qildi.
Saudiya tomoni ham Xalqaro Islom biyennalesi doirasida Oʻzbekiston idoralari bilan hamkorlikni rivojlantirishdan manfaatdor. Ushbu madaniy tadbir 2025-yilda Saudiya Arabistonida boʻlib oʻtishi kutilmoqda.
Eslatib oʻtamiz, Toshkent va Ar-Riyod oʻrtasida 1992-yilda diplomatik munosabatlar oʻrnatilgan. Saudiya Arabistoni Jahon sayyohlik tashkilotining navbatdagi sessiyasini Oʻzbekistonda oʻtkazish qarorini qoʻllab-quvvatlagan davlatlardan biri boʻldi.
Avvalroq «Kursiv» Saudiya Arabistonidan investorlar Oʻzbekistonda xalqaro maktablar ochishda yordam berishi mumkinligi haqida xabar bergan edi.