Yevrokomissiya Apple’ni “Raqamli bozorlar to‘g‘risida”gi qonunni buzganlikda aybladi

Apple kompaniyasi App Store’dagi ba’zi cheklovlari sabab katta jarimaga tortilishi mumkin. Bu haqda Yevrokomissiya o‘zining rasmiy veb-saytida xabar berdi.

24-iyun kuni Yevropa komissiyasi bu haqidagi dastlabki ma’lumotlarni e’lon qildi. Unga ko‘ra Apple joriy yilning mart oyida qabul qilingan «Raqamli bozorlar to‘g‘risida»gi qonunni  buzishda ayblanmoqda. Bunga App Store’da dastur ishlab chiquvchilarga foydalanuvchilar uchun to‘lov usullaridan erkin foydalanish imkoniyatini berishga ruxsat bermayotgani sabab sifatida ko‘rsatilgan. Ushbu qonunbuzarlik uchun birinchi martasida global aylanmaning 10 foizgacha, ikkinchi marta takrorlansa 20 foizgacha miqdordagi jarima qo‘llanilishi mumkin.

Qonun kuchga kirganidan buyon Alphabet, Amazon, Apple, Meta, Microsoft, ByteDance kabi texno-gigantlarning faoliyatini tartibga solib kelmoqda. Chunki yirik monopolistlar sifatida ushbu korporatsiyalar butun bozor va foydalanuvchilarning imkoniyatlariga keskin ta’sir o‘tkazish kuchiga ega.

Xulosalar dastlabki bo‘lib, Yevrokomissiyasi bu masala bo‘yicha natijalarni 2025-yil martigacha eʼlon qiladi.

Eslatib o‘tamiz, sal avvalroq Apple kompaniyasining 2025-yilda ishlab chiqarishni rejalashtirayotgan iPhone 17 smartfoni haqida batafsil to’xtalgan edik.