AQShda 27-iyun kuni prezidentlik saylovi oldidan Jo Bayden va Oq uyning sobiq rahbari Donald Tramp oʻrtasidagi ilk teledebat boʻlib oʻtdi. Siyosatchilar Jorjiya shtatining Atlanta shahridagi CNN studiyasida uchrashdi.
AQSh iqtisodiyotidagi vaziyat
Televizion duel AQSh iqtisodiyotidagi vaziyatni muhokama qilish bilan boshlandi. Tramp va Bayden inflyatsiya, ish oʻrinlari va soliq siyosati boʻyicha fikr almashdi. Oq uy rahbari oʻz prezidentligining iqtisodiy muvaffaqiyati deb hisoblagan omillarni sanab oʻtishdan boshladi va hali qilinishi kerak boʻlgan ishlar koʻpligini ta’kidladi. Tramp esa bunga javoban inflyatsiya Qoʻshma Shtatlarni «oʻldirmoqda», deb javob berdi.
Putinning Ukrainaga qoʻygan talablari haqida
Immigratsiya va abortni taqiqlash boʻyicha fikr almashgandan soʻng, nomzodlar moderatorlar tashabbusi bilan tashqi siyosat kun tartibiga oʻtishdi.
Avvaliga Ukrainadagi urush muhokama qilindi. Moderator Dana Bash debat ishtirokchilaridan Rossiya prezidenti Vladimir Putin tomonidan ilgari surilgan oʻt ochishni toʻxtatish shartlarini maqbul deb hisoblaysizmi, deb soʻradi.
Tramp Baydenni Ukrainadagi urushda ayblab, agar AQSh yetakchi boʻlganida keng koʻlamli hujumlar hech qachon sodir boʻlmasdi, dedi. «Bu hech qachon boshlanmasligi kerak boʻlgan urush», deb ta’kidladi sobiq prezident va Bayden davrida Kiyevga $200 milliard yoki undan koʻproq mablagʻ ajratilganini da’vo qildi. Putinning talablarini maqbul deb hisoblaysizmi, degan savolga Tramp: «Yoʻq, ularni qabul qilib boʻlmaydi», deb javob berdi.
Oʻz navbatida, prezident Bayden Vladimir Putinni «harbiy jinoyatchi» deb atadi.
Gʻazo sektoridagi vaziyat boʻyicha munozara
Keyinchalik siyosatchilar Gʻazo sektoridagi vaziyatga oʻtishdi. Jo Baydenning ta’kidlashicha, isroillik garovga olinganlarni falastinlik mahbuslarga almashtirish va uzoq muddatli «qoʻshimcha shartlar bilan oʻt ochishni toʻxtatish» rejasi muhokama qilinmoqda. «Urush davom etishini faqat HAMAS istamoqda», dedi Amerika rahbari.
Donald Tramp Bashning Gʻazo sektorida Isroil va HAMAS oʻrtasidagi urushni toʻxtatish uchun mustaqil Falastin davlati tashkil etilishini qoʻllab-quvvatlashi haqidagi savoliga toʻgʻridan-toʻgʻri javob bermadi. «Biz koʻrishimiz kerak», deb javob berdi.
Ma’lumot uchun, 5-noyabr kuni AQShda prezidentlik saylovlari boʻlib oʻtadi.
Avvalroq «Kursiv» AQSH Federal zaxira tizimi ketma-ket yettinchi marta yillik stavkani oʻzgartirishsiz qoldirgani haqida xabar bergan edi.
