Yong‘indan so‘ng "Chorsu" bozori qanday ahvolda – eksklyuziv fotosuratlar va videolar
Jumaga o‘tar kechasi mashhur Toshkentning «Chorsu» bozori hududida yong‘in sodir bo‘ldi. Yong‘in bozorning afsonaviy gumbazli binolariga yetib bormadi, balki savdo qatorlaridan o‘tib, o‘nlab savdogarlarni mulkidan mahrum qildi. «Kursiv» muxbiri favqulodda hodisa joyiga tashrif buyurdi va voqea joyidan olingan fotosuratlarni o‘quvchilar bilan baham ko‘rishga shoshilmoqda.
Yong‘in taxminan 2-3 sotix maydonni qamrab olgan. Guvohlarning so‘zlariga ko‘ra, yong‘in tungi soat ikkilarda boshlangan.
«Hech qanday mas’ul organlarga shikoyatim yo‘q, men nima sodir bo‘lganini bilmayman. Umid qilamanki, mutaxassislar yong‘in sabablarini aniqlaydilar va savdogarlarga yetkazilgan zarar qoplanadi», dedi «Kursiv»ga mahalliy savdogarlardan biri.
Voqea joyida Favqulodda vaziyatlar vazirligi, Milliy gvardiya xodimlari, shuningdek, bozor ma’muriyati, obodonlashtirish xizmati va SES xodimlari ish olib bormoqda. Favqulodda vaziyat joyi tozalandi.
Yong‘in sodir bo‘lgan hudud yaqinida ichki ishlar xodimlari fuqarolardan o‘z mulkiga yetkazilgan zararni qoplash bo‘yicha arizalarni qabul qilib, savdogarlarga maslahat berishmoqda.
«Kursiv» muxbiri savdogarlar vaqtinchalik voqea joyidan 30 metr uzoqlikda bozorning boshqa qismida faoliyat olib borishishini aniqladi.
Bozor ma’muriyati ham jabrlanganlar ro‘yxatini tuzgan, biroq izoh bermadi. Dastlabki ma’lumotlarga ko‘ra, yong‘in oqibatida 92 nafar fuqaroning mulki zarar ko‘rgan.
«Jabrlanuvchilarning asosiy iltimoslaridan biri ularga savdo qilish uchun joy ajratish, shuningdek, yetkazilgan zararni qoplash. Huquq-tartibot idoralari xodimlari bu yerda favqulodda vaziyat boshlanganidan beri ishlab, fuqarolarning muammolarini hal qilishda yordam berishmoqda», dedi huquq-tartibot xodimlaridan biri.
«Mutaxassislarimiz yong‘in sabablari va bozor infratuzilmasiga yetkazilgan zararni oldindan o‘rganmoqda, yong‘in nima sababdan sodir bo‘lganini aytish qiyin», deya xulosa qildi Favqulodda vaziyatlar vazirligi vakili.
Avvalroq «Kursiv» juma kuni kechqurun Chorsuda voqealar qanday kechgani haqida e’lon qilgan edi.
