Umrani litsenziyasiz tashkil qilgan kompaniyalar 68 million so‘m jarimaga tortiladi

O‘zbekistonda kichik ziyoratlarni (umra) tashkil etuvchi sayyohlik kompaniyalari maxsus litsenziya olishi kerak bo‘ladi, deb xabar berdi Adliya vazirligi.

«Litsenziyalash, ruxsat berish va xabardor qilish tartib-taomillari toʻgʻrisida»gi Qonunga kiritilgan so‘nggi o‘zgartishlardan so‘ng Umra faoliyatini tashkil etish litsenziyalanadigan faoliyatning alohida turi sifatida belgilandi.

Litsenziyalash qoidalarini buzganlik uchun 200 bazaviy hisoblash qiymati (BHM) yoki 68 million so‘m miqdorida jarima belgilandi.

Litsenziyalar Din ishlari boʻyicha qoʻmita tomonidan beriladi. Uni olish uchun sayyohlik kompaniyalari 10 BHM yoki 3,4 million so‘m to‘laydi.

Avvalroq «Kursiv» O‘zbekiston Qonunchilik palatasi ziyoratchilarni himoya qilish to‘g‘risidagi qonun loyihasini ma’qullagani haqida yozgan edi.