2024-yilning birinchi olti oyida Rossiyada mehnat muhojirlari tomonidan sodir etilgan ekstremistik jinoyatlar soni 55 foizga oshdi, deb xabar berdi ushbu mamlakat Tergov qo‘mitasi (TQ).
«Bu huquq-tartibot korpusidan jiddiy e’tibor talab qiladi», dedi tuzilma raisi Aleksandr Bastrikin. Bu haqda Rossiyaning «Interfaks» axborot agentligi xabar berdi.
Huquqni muhofaza qilish organi rahbarining so‘zlariga ko‘ra, bu muammo «nazorat qiluvchi organlar xodimlarining suiiste’mollari», shuningdek, tadbirkorlar bilan bog‘liq.
Rossiya Tergov qoʻmitasi ham soʻnggi olti oyda migrantlar tomonidan sodir etilgan zoʻrlashlar soni 5 foizga oshganini ma’lum qildi. Bolalarga nisbatan jinsiy tajovuzlar soni 25 foizga oshdi.
Avvalroq «Kursiv» xorijliklarning Rossiyada vaqtincha bo‘lish muddatini ikki baravar qisqartirishni istashlarini e’lon qilgan edi.
