Oltita kompaniya Toshkentdagi «International» mehmonxonasini sotib olishga qiziqish bildirdi. Bu haqda Davlat aktivlarini boshqarish agentligi (DABA) xabar qildi.
Mehmonxonadagi davlat ulushining 100 foizini sotib olish uchun arizalar Arab davlatlari, Sharqiy Osiyo va Yevropa davlatlaridan olti nafar investor tomonidan taqdim etilgan. Agentlik ularning barchasiga majburiy bo‘lmagan takliflarni (NBO) tayyorlash uchun hujjatlarni yuboradi. Takliflar 19-avgustga qadar qabul qilinadi.
2024-yilning birinchi yarim yilligi yakunlari bo‘yicha mehmonxonaning sof zararlari 1,47 mlrd so‘mni tashkil qildi. O‘tgan yili moliyaviy yo‘qotishlar 21,9 mlrd so‘mga yetdi.
Avvalroq «Kursiv» 2024-yil iyul oyida «Avtooyna» korxonasining davlat ulushi sotuvga qo‘yilgani haqida e’lon qilgan edi.
