Rossiya O‘zbekiston bilan aviaqatnovlar bo‘yicha yetakchilik qilmoqda

Rossiya O‘zbekiston bilan aviaqatnovlar hajmi bo‘yicha yetakchi, dedi Rossiyaning O‘zbekistondagi elchisi Oleg Malginov «Izvestiya» nashriga bergan intervyusida.

Diplomatning so‘zlariga ko‘ra, Rossiyaning deyarli barcha yirik shaharlari O‘zbekiston bilan to‘g‘ridan-to‘g‘ri reyslar orqali bog‘langan.

«Zarurat tug‘ilganda, yangi reyslarni ochishga tayyorgarligimiz bor. Aviatsiya idoralarimiz bu yo‘nalishda faoliyat olib bormoqda», dedi elchi.

Malginovning qo‘shimcha qilishicha, O‘zbekiston qiziqarli va jadal rivojlanayotgan mamlakat. Rossiyalik sayyohlar respublika tarixi, madaniyati va diqqatga sazovor joylari bilan tanishish uchun tashrif buyurishadi.

Malginov ta’lim mavzusiga ham to‘xtaldi. Uning so‘zlariga ko‘ra, Rossiya oliy o‘quv yurtlari va ularning filiallarida o‘zbekistonlik 60 mingga yaqin talabalar tahsil olmoqda.

Avvalroq Kursiv Uzbekistan O‘zbekiston va Rossiya o‘zaro savdoni uch barobarga oshirish niyatida ekani haqida yozgan edi.