O‘zbekiston va Janubiy Koreya elektrotexnika ishlab chiqarishni rejalashtirmoqda

O‘zbekiston hamda Janubiy Koreya kompaniyalari avtomobilsozlik va elektrotexnika ishlab chiqarish bo‘yicha kelishib oldi. Bu haqda «Dunyo» nashri xabar berdi.

Qayd etilishicha, Koreya Respublikasi elchisi Von Do Yon ishtirokida «O‘zbekiston – Koreya sanoat-akademik innovatsiyalar haftaligi – 2024» tadbirida qatnashish uchun O‘zRga kelgan Janubiy Koreya kompaniyalari vakillari bilan uchrashuv bo‘lib o‘tdi.

Uchrashuv davomida O‘zbekistonda investitsiya va ishbilarmonlik muhitini yaxshilash maqsadida amalga oshirilayotgan islohotlar, xorijiy investorlarni qo‘llab-quvvatlash va mamlakatda tadbirkorlikni rivojlantirish chora-tadbirlari to‘g‘risida batafsil ma’lumot berildi.

Bundan tashqari, investitsiya va savdo-iqtisodiy sohalardagi ikki tomonlama munosabatlarni yanada rivojlantirish va kengaytirish masalalari alohida muhokama qilindi.

Eslatib o‘tamiz, avvalroq Kursiv Oʻzbekiston Janubiy Koreya kompaniyasidan oltita elektropoyezd xarid qilishi haqida xabar bergan edi.