Oʻzbekiston Markaziy banki Bazel maslahat guruhiga aʼzo boʻldi

Oʻzbekiston Markaziy banki bank nazorati boʻyicha Bazel qoʻmitasining (BCBS) maslahat guruhiga qoʻshildi. Bu haqda regulyator matbuot xizmati xabar berdi.

Bazel maslahat guruhi (BCG) qoʻmitaga aʼzosi boʻlmagan bank nazoratchilari bilan hamkorlik qilish uchun yaratilgan. Guruh aʼzolari BCBS munozaralari va faoliyatida ishtirok etishlari mumkin.

Qoʻmita faoliyatining asosiy maqsadi bank sohasida xalqaro standartlarni ishlab chiqish va joriy etishdan iborat. Qoʻmita tadqiqot olib boradi, moliyaviy risklarni tahlil qiladi va tartibga soluvchilar oʻrtasida tajriba almashish uchun platforma yaratadi.

Maʼlumot uchun, BCBS qarorlari qonuniy kuchga ega emas. Qoʻmita aʼzolari oʻz standartlarini mustaqil ravishda, ixtiyoriy asosda amalga oshiradi.

Avvalroq Kursiv Uzbekistan Oʻzbekiston Markaziy bankining oltin-valyuta zaxiralari $41 milliarddan oshgani haqida xabar bergan edi.