Abduqodir Husanov yilning eng yaxshi yosh futbolchisi sovriniga da’vogar bo‘ldi

Futbol tarixi va statistikasi xalqaro federatsiyasi (IFFHS) 2004-yilda tug‘ilgan futbolchilar orasida dunyoning «Eng yaxshi yosh futbolchisi» bo‘lishga da’vogar bo‘lgan 25 futbolchi nomini e’lon qildi.

Ushbu ro‘yxatda O‘zbekiston milliy terma jamoasi va «Lans» klubi himoyachisi Abduqodir Husanov ham joy olgan. Futbolchi «Bunyodkor» klubi tarbiyalanuvchisi hisoblanadi.

Joriy yil sentabr oyida Sofascore portali eng yaxshi yosh futbolchilar reytingini taqdim etgan edi. Undan Husanov ham joy olgan. Shuningdek, ushbu ro‘yxatda Lamin Yamal («Barselona»), Florian Wirtz («Bayer» Leverkuzen) va Jud Bellingem («Real Madrid») kabi taniqli futbolchilar joy olgan edi.

Avvalroq Kursiv Uzbekistan 2023-yilgi Osiyo kubogida e’tibor berish kerak bo‘lgan futbolchilar ro‘yxatida Abduqodir Husanov ham borligini yozgan edi.