Samsung kompaniyasi rasmiy ravishda Samsung W25’ni taqdim etdi, uning texnik xususiyatlari, narxi va chiqarilish muddatlarini tasdiqladi.
Tashqi ko‘rinishning o‘ziga xos jihatlari
Janubiy Koreya texnologik giganti tomonidan ishlab chiqilgan W25 modeli Galaxy Z Fold6’dan biroz farq qiladi.
Ushbu model Galaxy Z Fold 6’dan 1,5 mm ingichkaroq bo‘lib, buklangan holatda qalinligi atigi 10,6 mm.ni tashkil etadi.
Smartfon 8 dyuymli 2184 x 1968 piksel o‘lchamdagi Dynamic AMOLED 2X displeyga egadir. Shuningdek, qurilma 120 Gs adaptiv yangilanish chastotasi hamda 2,6 ming nitgacha bo‘lgan maksimal yorqinlik bilan jihozlangan.
Tashqi tomonda 6,5 dyuymli HD+ Dynamic Amoled 2X qoplama displeyi mavjud bo‘lib, u ham 120 Gs adaptiv yangilanish chastotasi, 2,6 ming nitgacha bo‘lgan maksimal yorqinlik va Corning Gorilla Glass Victus 2 tashqi himoyasiga ega.
Ichki imkoniyatlar
Qurilma ichida Snapdragon 8 Gen 3 for Galaxy protsessori o‘rnatilgan bo‘lib, u 16 GB tezkor xotira va 512 GB yoki 1 TB ichki flesh xotira bilan ishlaydi.
Orqa panelda Galaxy Z Fold 6’dagi 50 MP asosiy datchik o‘rniga 200 MP asosiy kamera joylashgan. U 12 megapiksellik keng burchakli obyektiv va 10 megapiksellik teleobyektiv moduli bilan birga ishlaydi.
Selfi va videoqo‘ng‘iroqlar uchun tashqi ekranda 10 megapiksellik kamera va asosiy displey ostida 4 megapiksellik kamera mavjud.
Smartfonda 4,4 ming mA•soat sig‘imli akkumulyator 25 Vt quvvatli simli zaryadlash va 15 Vt quvvatli simsiz zaryadlash funksiyalari mavjud.
Qurilma jihozlari orasida yon tomonda barmoq izi skaneri, IP48 darajasidagi suv va changdan himoya, Dolby Atmos qo‘llab-quvvatlovchi stereodinamiklar hamda Android 14 bazasidagi One UI 6.1.1 firmaviy interfeysi mavjud.
Ushbu smartfon narxlari $2,2 mingdan boshlanib, $2,5 minggacha yetadi. Savdolar Xitoyda 15-noyabrdan boshlanishi rejalashtirilgan.
Eslatib o‘tamiz, avvalroq Kursiv Uzbekistan Samsung kompaniyasi chet eldagi bo‘linmalarida xodimlarni 30 foizga qisqartirishi haqida xabar bergan edi.
Avvalroq Kursiv Uzbekistan nashri Apple iPhone 16 taqdim etgani haqida xabar bergan, shuningdek, qurilma narxlari haqida ham yozgan edi.
