Jeff Bezos Amazon’ning $2,7 milliardlik aksiyalarini sotdi

Jeff Bezos noyabr oyida Amazon’ning $2,7 milliardlik aksiyalarini sotdi. Bu haqda «Interfaks» manbalarga tayanib, xabar bermoqda.

Savdolar 2025-yil oxirigacha 25 million dona aksiyani sotish oldindan belgilangan rejalar doirasida amalga oshirilmoqda. Ayni paytda tadbirkor kompaniyaning 22 millionga yaqin aksiyalarini sotib boʻldi.

Joriy yil boshida beri Bezos Amazonʼning $8 milliardlik aksiyalarini sotgan boʻlsa-da, u hali ham kompaniyaning taxminan $220 milliardlik aksiyalariga egalik qiladi. 2024-yilda Amazon kapitallashuvi 37,5 foizga oshib, $2,17 trillionni tashkil qildi.

Eslatib oʻtamiz, Jeff Bezosning umumiy boyligi qariyb $230 mlrd.ni tashkil qilib, dunyoning eng boy insonlari qatorida ikkinchi oʻrinni egallab turibdi.

Avvalroq Kursiv Uzbekistan Nissan aksiyalari soʻnggi 15 yildagi eng katta oʻsishni qayd etgani haqida xabar bergan edi.