«O‘zbekiston – so‘zsiz favorit»: Futbol mutaxassisi Qatar – O‘zbekiston uchrashuvi prognozini ma’lum qildi
Bugun, 14-noyabr kuni futbol bo‘yicha 2026-yilgi Jahon chempionati saralash bosqichi doirasida O‘zbekiston va Qatar terma jamoalari o‘rtasidagi uchrashuv bo‘lib o‘tadi. Xalqaro futbol eksperti Alisher Nikimbaev Kursiv Uzbekistan nashriga ushbu o‘yindan nimalar kutish mumkinligi haqida o‘z fikrlarini bildirdi.
Nikimbaevning ta’kidlashicha, O‘zbekiston terma jamoasi 2008-yil sentabr oyidan beri rasmiy o‘yinlarda Qatar terma jamoasidan mag‘lubiyatga uchramagan. 2008-yilda O‘zbekiston Jassim bin Hamad stadionida Qatarga 3:0 hisobida yutqazgan edi. Bugungi o‘yin ham aynan shu maydonda bo‘lib o‘tadi.
«O‘shandan buyon Osiyo kubogida faqat bir bor mag‘lub bo‘lganmiz, u ham penaltilar seriyasida. Qolgan barcha o‘yinlarda g‘alaba qozonganmiz. Umuman olganda, o‘zaro uchrashuvlar tarixi va jamoalar kuchini inobatga olsak, O‘zbekiston so‘zsiz favorit hisoblanadi», – dedi ekspert.
Nikimbaev, shuningdek, Qatarning yaqinda bo‘lib o‘tgan Osiyo kubogidagi g‘alabasi haqida ham fikr bildirdi.
«Qatarning Osiyo kubogidagi g‘alabasi yuqori mahorat natijasi emas, balki taqdir sovg‘asi bo‘ldi. Qatarning guruhida kuchli jamoalar yo‘q edi, 1/8 finalda zaif raqib (Falastin) bilan o‘ynadi. Yarim finalga chiqish bilan Qatar jamoasi katta natijaga erishganini e’lon qildi va bu ularga o‘zini erkin his etish imkonini berdi», – deya qo‘shimcha qildi Nikimbaev.
Qatar terma jamoasining hozirgi holati haqida gapirar ekan, Nikimbaev Qatarda avlodlar almashinuvi kechayotganini aytib o‘tdi va saralash turnirining avvalgi o‘yinlaridan birida jamoada birdaniga olti nafar debyutant maydonga tushganini ta’kidladi.
«Barcha omillarni inobatga olgan holda, uchrashuvning eng katta ehtimol natijasi durang bo‘lib, bu O‘zbekiston uchun foydali. Chunki bu holatda biz Qatar ustidan olti ochkolik ustunlikni saqlab qolamiz», – dedi u.
«Durang natija O‘zbekistonga Jahon chempionatiga yanada yaqinlashish imkonini beradi. Kvotalar soddalashtirilganini inobatga olsak, terma jamoaning mundialga chiqishi qiyin bo‘lmaydi», – deya xulosa qildi Alisher Nikimbaev.
Avvalroq Kursiv Uzbekistan O‘zbekistonning «Paxtakor» klubi Qatarning «Al-Rayyan» jamoasiga 0:1 hisobida imkoniyatni boy bergani haqida xabar bergan edi.
