Ikki kunlik mehnat $500 ming olib keldi

Telegram asoschisi Pavel Durov yaqinda bir ishlab chiqarilgan mini ilova yaratishdagi ajoyib muvaffaqiyati haqida post qoldirdi. Bu haqda u o‘z Telegram sahifasida ma’lum qildi.

Unga ko‘ra, ushbu mini ilova ikki kun ichida ishlab chiqilib, qisqa vaqtda katta daromad keltirdi. Bu loyiha nafaqat Telegram platformasining imkoniyatlarini, balki individual ijodkorlik va qat’iyatning natijalarini ham yaqqol ko‘rsatdi.

Durovning ta’kidlashicha, ishlab chiquvchi mini ilovani asosiy ishidan ta’tilda bo‘lgan vaqtida ikki kun ichida mustaqil ravishda yaratgan. Muhimi, u bu jarayonda hech qanday jamoa yoki marketing byudjetidan foydalanmagan. Barcha ishni — dizayndan tortib server tomonidagi kodgacha — u o‘zi bajargan. Ushbu yondashuv Durovni 2006-yilda VKontakte ijtimoiy tarmog‘ini yaratganidagi tajribasini eslatdi. U o‘z postida ishlab chiquvchining ijodkorlik, bilim va qat‘iyatini yuqori baholadi.

Mini ilova foydalanuvchilar orasida tezda ommalashib, «virusga» aylandi. Uning oddiy va minimalist dizayni, shuningdek, innovatsion yondashuvi uni oxirgi o‘n kun ichida Telegram’dagi eng ko‘p daromad keltiruvchi mini-ilovalar to‘rtligiga olib chiqdi.

Durovning ta’kidlashicha, bu o‘z g‘oyasini amalga oshirishni istagan ilova ishlab chiquvchilar uchun motivatsiya bo‘lib xizmat qilishi lozim.

Eslatib o‘tamiz, avvalroq Telegram ilova va oʻyin ishlab chiquvchilari uchun yangi funksiyalarni taqdim etdi.