Oʻzbekiston Xitoy bilan JSTga a’zo boʻlish boʻyicha muzokaralarni yakunladi

Oʻzbekiston Jahon Savdo Tashkilotiga (JST) a‘zo boʻlish bo‘yicha Xitoy bilan muzokaralarni yakunladi. Bu haqda prezidentning JST masalalari bo‘yicha maxsus vakili Azizbek Urunov o‘z LinkedIn sahifasida ma’lum qildi.

Unga ko‘ra, Urunov Pekindagi muzokaralarni samarali deb atadi va Xitoyning Savdo vazirligi vakillariga hamkorlik uchun minnatdorchilik bildirdi.

Oʻzbekistonning JSTga a’zo boʻlishini tashkilotning 22 ishtirokchisi allaqachon ma’qullagan. Yaqinda respublika AQSh bilan uzoq davom etgan muzokaralarni muvaffaqiyatli yakunladi. Urunovning so‘zlariga ko‘ra, endi faqat bir necha davlatning roziligini olish qolgan.

O‘zbekiston JSTga aʼzo bo‘lish bo‘yicha muzokaralarni 2019-yilda qayta boshladi. Agar barcha muzokaralar muvaffaqiyatli o‘tsa, O‘zbekiston 2026-yilda tashkilotga aʼzo bo‘lishi mumkin.

Eslatib o‘tamiz, avvalroq Azizbek Urunov AQShning roziligi O‘zbekistonning JSTga a’zo bo‘lish bo‘yicha muzokaralarni tezlashtirishi mumkinligi haqida aytgan edi.