Donald Tramp qudalarini yirik lavozimlar bilan siyladi

AQSHning yangi saylangan prezidenti Donald Tramp qudasi Massad Bulosni arab va Yaqin Sharq masalalari bo‘yicha bosh maslahatchi lavozimiga tayinladi. Bu haqda u Truth Social tarmog‘ida e’lon qildi.

Unga ko‘ra, Bulos Trampning qizi Tiffanining qaynotasi hisoblanadi. 2022-yilda Tiffani Bulosning o‘g‘li Mayklga turmushga chiqqan. Saylov kampaniyasi davomida Bulos musulmon jamoatchiligi vakillari bilan uchrashuvlar o‘tkazib, respublikachilarni qo‘llab-quvvatladi. Uning faoliyati Trampning Michigan shtatida g‘alaba qozonishiga yordam berdi.

Massad Bulosning oilasi Livanda nufuzli siyosiy shaxslar sifatida tanilgan. Uning otasi va bobosi mamlakat siyosatida muhim rol o‘ynagan, qaynotasi esa «Ozod vatanparvarlik harakati» partiyasining asosiy homiylaridan edi. Bulosning o‘zi ham Livanning turli siyosiy guruhlari, jumladan, «Hizbulloh» bilan aloqalar o‘rnatgan.

Bundan tashqari, Tramp qizi Ivankaning qaynotasi Charlz Kushnerni Fransiyaga elchi lavozimiga tayinladi. Kushnerning o‘g‘li Jared Trampning avvalgi prezidentlik davrida maslahatchi bo‘lib, Yaqin Sharq tinchlik kelishuvlari, jumladan, «Ibrohim bitimi»ni imzolashda muhim rol o‘ynagan.

Eslatib o‘tamiz, avvalroq Tramp Meksiya, Kanada va Xitoy mahsulotlariga boj to‘lovlarini oshirishi haqida yozgan edik.