Tramp NASA rahbarligiga millarder Jared Ayzekmanni nomzod sifatida ko‘rsatdi
AQSh prezidenti Donald Tramp NASA rahbari lavozimiga milliarder, Shift4 Payments kompaniyasining asoschisi Jared Ayzekmanni nomzod sifatida ko‘rsatdi. Bu haqda u o‘zining Truth’dagi sahifasida ma’lum qildi.
Trampning ma’lum qilishicha, Ayzekmanning kosmosga bo‘lgan ishtiyoqi, astronavtlik tajribasi va ilmiy izlanishlarni kengaytirishdagi maqsadlari uni ushbu lavozim uchun ideal nomzodga aylantiradi.
Ayzekman esa bu u uchun katta sharaf ekanini ta’kidlab, kosmosning kelajakdagi imkoniyatlariga urg‘u berdi. U ikkinchi kosmik asr endi boshlanayotganini va kosmosning ishlab chiqarish, biotexnologiyalar va energiya manbalarini qidirish sohasida ulkan salohiyatga ega ekanini qayd etdi.
41 yoshli Ayzekman SpaceX kompaniyasining Polaris Dawn missiyasida ishtirok etgan va ushbu tadqiqot loyihasini moliyalashtirgan. Uning boyligi Forbes ma’lumotlariga ko‘ra, $1,7 mlrdni tashkil qiladi. Ayzekman 1999-yilda 16 yoshida elektron to‘lov kompaniyasiga asos solgan. Bugungi kunda AQShdagi har uchinchi mehmonxona va restoran to‘lovlarini qayta ishlashda uning kompaniyasi xizmatidan foydalanadi.
Manbalarga ko‘ra, Ayzekman Ilon Maskning yaqin hamkori hisoblanadi va Trampning bu qarorida Maskning ta’siri bo‘lishi mumkin.
Eslatib o‘tamiz, avvalroq Ayzekman ishtirokidagi SpaceX’ning koinotga maxsus missiyasi haqida yozgan edik.
