Shavkat Mirziyoyev Toshkent shahridagi qurilish va obodonlashtirish loyihalarining taqdimotida ishtirok etdi. Bu haqda prezident matbuot xizmati ma’lum qildi.
Unga ko‘ra, davlat rahbari jamiyatning zamonaviy ehtiyojlariga mos ravishda yangi qurilishlar va yashash sharoitlarini yaxshilash zarurligini ta’kidladi.
Toshkentdagi Yunusobod dehqon bozori bo‘yicha yangi loyiha taqdim etildi. Ushbu loyiha bo‘yicha bozorda savdo o‘rinlari va qulayliklar ko‘paytiriladi, uch qavatli ekobozor qurilib, yerosti avtomobil turargohi va savdo markazi yaratish rejalashtirilgan. Bu loyiha 4-5 ming ish o‘rni yaratishni maqsad qilmoqda.
Shuningdek, poytaxtdagi istirohat bog‘larini obodonlashtirish bo‘yicha ham rejalarning taqdimoti bo‘ldi. Abdulla Qodiriy bog‘i obodonlashtiriladi, yashil hududlar ko‘paytiriladi, sayr joylari va yangi planetariy quriladi. «Do‘stlik» bog‘i ham yangilanib, oilaviy dam olish maskaniga aylantiriladi.
Prezident Toshkent shahrida mavjud bo‘lgan «Navro‘z» bog‘i kabi hududlarni rivojlantirishni davom ettirish zarurligini ta’kidladi. Shuningdek, Nurafshon va Namangan shaharlarida ham «Yangi O‘zbekiston» bog‘lari tashkil etilib, turizm markazlari va boshqa inshootlar qurilishi ko‘zda tutilgan.
Loyihalar orasida milliy an’analarni aks ettirgan ko‘ngilochar maskanlar va yashil hududlar yaratishga alohida e’tibor qaratiladi.
Eslatib o‘tamiz, avvalroq Toshkent viloyatida «Aqlli shahar» qurilishi haqida yozgan edik.
