Sudanda davom etayotgan qurolli to‘qnashuvlar va iqtisodiy inqiroz natijasida oziq-ovqat inqirozi chuqurlashmoqda. Bu haqda un.news ma’lum qildi.
Unga ko‘ra, 24 mln.dan ortiq odamlar jiddiy oziq-ovqat tanqisligi bilan yuzlashmoqda. Ularning 600 mingdan ortig‘i halokat xavfi ostida. BMTning Oziq-ovqat dasturi (WFP) va UNICEF tashkilotlari keng miqyosdagi ochlik xavfini tasdiqladi va gumanitar yordamni tezlashtirish zarurligini ta’kidlamoqda.
Sotuvga chiqadigan mahsulotlarning narxi oshgan, bozorlar ishlamayapti, shuningdek, qurolli to‘qnashuvlar oziq-ovqat va yordam yetkazib berishni qiyinlashtirmoqda. Sudan aholisi qishloq xo‘jaligidan foydalana olmayapti, ko‘plari o‘z uylarini tark etgan.
Gumanitar tashkilotlar, jumladan, WFP va UNICEF, zararlangan hududlarga yordam yetkazib berishga harakat qilmoqda. WFP 800 mingdan ortiq odamlarga oziq-ovqat yordami ko‘rsatgan bo‘lsa, UNICEF 6,7 million bolani tekshirib, 415 mingdan ortig‘iga davolash yordamini taqdim etdi.
Agar xalqaro hamjamiyat tezkor yordam ko‘rsatmasa, vaziyat yanada yomonlashishi mumkin. Gumanitar tashkilotlar tezkor yordam yetkazib berish uchun otishmalarni to‘xtatish zarurligini ta’kidlamoqda.
Eslatib o‘tamiz, avvalroq Turkiyada zavoddagi portlashda 12 kishi halok bo‘lgan edi.
