Gruziya parlamentida Mixail Kavelashvilining inauguratsiya marosimi boʻlib oʻtdi

Bugun, 29-dekabr kuni Gruziyaning yangi saylangan prezidenti Mixail Kavelashvilining inauguratsiya marosimi boʻlib oʻtdi. Bu haqda «RIA Novosti» nashri xabar berdi.

Ma’lum qilinishicha, inauguratsiya marosimi mamlakat parlamenti binosida boʻlib oʻtdi. Yangi prezident Gruziyaning oltinchi prezidentiga aylandi. Kavelashvili saylov komissiyasi tomonidan prezident etib saylandi, uning nomzodini 300 nafar saylovchidan 224 nafari qoʻllab-quvvatladi.

Sobiq davlat rahbari Salome Zurabishvili va muxolifat Kavelashvilini prezident deb tan olishdan bosh tortdi.

Ma’lumot uchun, Kavelashvili oʻtmishda iste’dodli futbolchi boʻlib, Tbilisining «Dinamo», Vladikavkazning «Alaniya», Angliyaning «Manchester Siti» klublarini himoya qilgan. 2018-yildan beri u Gruziya parlamentida «Gruzin orzusi» manfaatlarini himoya qilmoqda.

Avvalroq Kursiv Uzbekistan sobiq futbolchi Mixail Kavelashvili Gruziya prezidenti boʻlgani haqida xabar bergan edi.