2025-yilda Oʻzbekiston davlat ommaviy axborot vositalariga ajratiladigan mablagʻlar sezilarli ravishda oshadi. Bu «Davlat budjeti toʻgʻrisida»gi Qonun va prezident qaroriga muvofiq amalga oshirilmoqda.
Ma’lum qilinishicha, Oʻzbekiston milliy teleradiokompaniya (MTRK) uchun 881,3 milliard soʻm ajratilib, bu 2024-yildagiga nisbatan 58,5 foiz koʻpdir. Ushbu mablagʻlar zamonaviy uskunalar xarid qilish, «Oʻzbekiston 24» va «Mahalla» telekanallarini HD-formatga oʻtkazish va islohotlarni yoritishga yoʻnaltiriladi.
Shuningdek, Oʻzbekiston Milliy axborot agentligiga (UzA) 40,7 milliard soʻm ajratilib, bu oʻtgan yilga nisbatan 15,4 foiz koʻpdir. UzA 2025-yilda 95 mingta material e’lon qilish va 165 mingta yangi obunachini jalb qilishni rejalashtirgan.
«Yangi Oʻzbekiston», «Pravda Vostoka», «Nurli Yoʻl» va «Ovozi Tojik» gazetalariga 65,65 milliard soʻm ajratilib, ushbu mablagʻlar nashrlar sifatini oshirishga qaratiladi.
Avvalroq Kursiv Uzbekistan Iqtisodiyot va moliya vazirligi 2025-yilda mamlakat budjetidan 96 trillion soʻm olishi haqida xabar bergan edi.
