Shavkat Mirziyoyev Birlashgan Arab Amirliklariga joʻnab ketdi

Bugun, 13-yanvar kuni prezident Shavkat Mirziyoyev Birlashgan Arab Amirliklari (BAA) prezidenti Shayx Muhammad Ol Nahayonning taklifiga binoan rasmiy tashrif bilan ushbu mamlakatga joʻnab ketdi.

Tashrif dasturida Amirliklar poytaxti Abu-Dabi shahrida oliy darajadagi muzokaralar, shuningdek, BAAning yetakchi tashkilotlari, kompaniya va banklari rahbarlari bilan ikki tomonlama uchrashuvlar boʻlib oʻtadi.

Oʻzbekiston prezidenti «Abu-Dabi barqaror rivojlanish haftaligi» xalqaro sammitida ham ishtirok etadi.

Shuningdek, davlat rahbari Dubay shahriga tashrif buyurib, Birlashgan Arab Amirliklari vitse-prezidenti, Bosh vaziri, Dubay Amiri Shayx Muhammad Ol Maktum bilan uchrashuv oʻtkazadi.

Avvalroq Kursiv Uzbekistan prezident BAAga borishi haqida xabar berdi.