Fergani Space loyihasining birinchi sun’iy yo‘ldoshi uchirildi

SpaceX kompaniyasi Turkiyaning Baykar kompaniyasi ishtirokida ishlab chiqilgan Fergani Space loyihasining birinchi sun’iy yo‘ldoshini orbitaga muvaffaqiyatli olib chiqdi. Ushbu muhim uchirish AQShning Vandenberg harbiy bazasidan Transporter-12 missiyasi doirasida amalga oshirildi. Bu haqda TASS agentligi ma’lum qildi.

Sun’iy yo‘ldosh Turkiyaning global joylashuv tizimini rivojlantirish bo‘yicha Fergani loyihasining bir qismi hisoblanadi. Baykar raisi Selchuk Bayraktar loyihaning koinotni tadqiq qilish yo‘nalishida yangi marralarni ochganini ta’kidladi: «20 yillik maqsadga erishganimizdan so‘ng biz koinotni o‘rganishga qadam tashladik».

Loyiha doirasida Fergani sun’iy yo‘ldoshi uchun maxsus ishlab chiqilgan vodorod peroksidli dvigatel 2024-yil may oyida muvaffaqiyatli sinovdan o‘tkazilgan edi. Ushbu loyiha koinot tadqiqotlari va global joylashuv tizimini rivojlantirish sohasida Turkiyaning o‘rni va ahamiyatini yanada oshirishni maqsad qilgan.

Avvalroq Kursiv Uzbekistan Al-Farg‘oniy nomiga bag‘ishlab Fergani sun’iy yo‘ldoshi paydo bo‘lishi haqida xabar bergan edi.