AQSh Davlat kotibi lavozimiga nomzod Marko Rubio Jekson-Venikning O‘zbekiston va boshqa Markaziy Osiyo davlatlariga qarshi tuzatilishini o‘tmish yodgorligi deb atadi. Bu haqda u Senatdagi tinglovda aytib o‘tdi.
Siyosatchining qo‘shimcha qilishicha, ushbu tuzatishdan mintaqa mamlakatlariga bosim vositasi sifatida foydalanish mantiqqa to‘g‘ri kelmaydi. Uning so‘zlariga ko‘ra, tashabbusni bekor qilish faqat qonunchilikka o‘zgartirishlar kiritish orqali mumkin.
Rubio Vashington Markaziy Osiyo mintaqasiga koʻproq e’tibor qaratishi kerakligini ta’kidladi.
2023-yilda Konnektikut shtatidan amerikalik senator Kris Merfi O‘zbekiston, Qozog‘iston va Tojikistonga nisbatan ushbu tuzatishni bekor qilish tarafdori edi. Siyosatchining fikricha, Vashington ularga doimiy normal savdo aloqalari maqomini berishi kerak.
Ushbu tuzatishning bekor qilinishi mintaqadagi uch davlatga o‘z iqtisodiyotlarini diversifikatsiya qilish va Rossiya va Xitoy ta’sirini kamaytirishga yordam beradi.
«Qo‘shma Shtatlar ushbu imkoniyat oynasidan foydalanishi va ekspluatatsiyaga emas, balki hamkorlikka asoslangan strategik muqobil taklif qilishi kerak», – dedi Merfi o‘sha paytda.
AQSh Savdo qonuniga Jekson-Venik tuzatishi 1974-yilda kongressmenlar Genri Jekson va Charlz Vanik tashabbusi bilan qabul qilingan. Tashabbus emigratsiyani taqiqlagan va inson huquqlarini buzgan davlatlarga nisbatan savdo cheklovlarini joriy etishga imkon berdi.
Statistika agentligi ma’lumotlariga koʻra, 2024-yilning 11 oyi davomida Oʻzbekiston va AQSh oʻrtasidagi tovar ayirboshlash hajmi yillik oʻsish 26,7 foizni tashkil qilib, $773,3 mlnga yetgan. 2022-yilda bu ko‘rsatkich $392,3 mlnni tashkil qilgan.
Avvalroq Kursiv Uzbekistan nashri O‘zbekiston AQSh bilan muzokaralarni yakunlagani haqida xabar bergan edi.
