Galaxy S25 Ultra qachon sotuvga chiqadi

Android Headlines portali yangi Galaxy AI sun’iy intellekt funksiyalariga ega boʻlgan Samsung Galaxy S25 Ultra flagman smartfoni namoyish etilgan videoni taqdim qildi.

Qayd etilishicha, video e’lon qilinganidan koʻp oʻtmay Samsung kompaniyasi talabi bilan olib tashlangan. Videoning sifatiga koʻra, u rasmiy, ammo premyeradan bir necha kun oldin tarmoqqa tarqalib ketgan.

Videoda Nightography funksiyasi taqdim etilgan boʻlib, unda sun’iy intellekt yanada kengroq dinamik diapazon va yaxshilangan barqarorlashtirish tizimini ta’minlab, tungi suratga olish rejimini yaxshilaydi. Videolardan keraksiz tovushlarni qirqish imkonini beruvchi Audio Eraser rejimi va yanada aqlli hamda sezgir boʻlgan yangilangan ovozli yordamchi ham namoyish etildi.

Video oxirida uchta smartfonning orqa paneli koʻrsatilgan: Galaxy S25 Ultra va ehtimol, Galaxy S25 va Galaxy S25 Plus.

Samsung Galaxy S25 seriyali smartfonlarining rasmiy taqdimoti 22-yanvar kuni Galaxy Unpacked tadbiri doirasida boʻlib oʻtadi.

Avvalroq Kursiv Uzbekistan Galaxy S26 silikon-uglerodli batareyalar orqali inqilobni boshlashi mumkinligi haqida xabar bergan edi.