Instagramda Reels videolarining maksimal davomiyligi uch daqiqagacha uzaytirildi

Instagram endi foydalanuvchilarga 3 daqiqagacha bo‘lgan uzunlikdagi Reels videolarini yuklash imkoniyatini taqdim etdi. Bu yangilik avvalgi 90 soniyalik cheklovni ikki baravar oshiradi. Ushbu o‘zgarish haqida Instagram rahbari Adam Mosseri bugun e’lon qildi.

Mosserining so‘zlariga ko‘ra, bu qaror foydalanuvchilarning «90 soniya juda qisqa», degan fikr-mulohazalari asosida qabul qilingan. Bu Instagram uchun yangi strategik burilish bo‘lib, o‘tgan yili Mosseri platformaning asosiy maqsadi odamlarni do‘stlari bilan bog‘lash ekanini ta’kidlab, uzoq videolarni qo‘llab-quvvatlashga qarshi edi.

Yangilik, ayniqsa, TikTok’ning AQShda taqiqlanishi ehtimoli ortayotgan bir paytda ahamiyat kasb etmoqda. TikTok 2021-yildan boshlab 3 daqiqalik videolarni joriy qilgan edi.

Instagram Reels uzunligini oshirish jarayonini sekin-asta amalga oshirib kelmoqda. Dastlab, 90 soniyali videolarni qo‘llab-quvvatlay boshlaganidan ikki yil o‘tib, platforma endi 3 daqiqagacha bo‘lgan videolarni yuklashga ruxsat bermoqda. Instagram hatto 10 daqiqagacha videolarni sinovdan o‘tkazgan, ammo uzoqroq videolarni oddiy postlarga joylashtirish imkoniyatini saqlab qoldi.

Avvalroq Kursiv Uzbekistan TikTok AQShda yana ishlay boshlagani haqida xabar bergan edi.