Besh grammlik oltin quymasining narxi 6 mln soʻmga yaqinlashdi
31-yanvar kuni besh grammlik oltin quymasining narxi maksimal 5,98 mln soʻmga yetdi. Bu haqda Markaziy bank matbuot xizmati xabar berdi.
Shu bilan birga, 10 grammlik quymalar 11,97 mln soʻm, 20 grammlik quymalar 23,94 mln soʻm, 50 grammlik quymalar 59,85 mln soʻm va 100 grammlik quymalar 119,7 mln soʻmni tashkil qildi.
Mamlakatda qimmatbaho metall narxlari jahon kotirovkalari ortidan oʻsib bormoqda. Xalqaro maydonlarda troya unsiyasining narxi AQShda inflyatsiya haqidagi ma’lumotlar e’lon qilinishi arafasida rekord darajadagi $2,859 ga yetdi.
Bundan tashqari, Amerika Qoʻshma Shtatlariga Meksika, Kanada va Xitoy tovarlari importiga yuqori bojlar joriy etilishi fonida aktivga boʻlgan talab ortib bormoqda. Jurnalistlarning ma’lumotlariga koʻra, AQSh prezidenti Donald Tramp yaqin kunlarda tariflar toʻgʻrisidagi farmonni imzolashi mumkin.
AQSh gʻazna obligatsiyalari daromadliligining pasayishi va dollarning toʻgʻrilanishi oltin kotirovkalarini qoʻshimcha qoʻllab-quvvatlaydi. Qimmatbaho metallar narxining oshishining uzoq muddatli omillari orasida tahlilchilar jahon markaziy banklari stavkalarining pasayishi va suveren qarzlar boʻyicha rekord toʻlovlarni ajratib koʻrsatishadi.
Avvalroq Kursiv Uzbekistan oʻtgan yili Oʻzbekiston $7,2 mlrdlik oltin yetkazib bergani haqida yozgan edi.
