Xitoy ekipajli oyga qo‘nish missiyalarini qo‘llab-quvvatlash uchun tanlov e’lon qildi

Xitoy o‘zining birinchi insonli kosmik missiyasini amalga oshirish uchun oy yo‘ldoshini yaratish bo‘yicha tanlov e’lon qildi. Bu haqda Space news nashri ma’lum qildi.

Unga ko‘ra, 14-fevralda Xitoyning Insonli kosmonavtika loyihalari boshqarmasi (CMSEO) oy yo‘ldoshini yaratish uchun tanlovni boshladi. Loyihada aytilishicha, yangi yo‘ldosh Xitoyning oyga birinchi qo‘nish missiyasini va keyingi missiyalarni qo‘llab-quvvatlash uchun mo‘ljallangan bo‘ladi. Tanlovga qatnashish uchun takliflar 8-martgacha yuborilishi kerak.

Ma’lumot uchun, Xitoyning oyga qo‘nish missiyasi 2030-yilga qadar amalga oshirilishi rejalashtirilgan. Bu missiya Xitoyning oyda resurslarni o‘rganish va barqaror tadqiqotlarni amalga oshirishga qaratilgan uzoq muddatli rejalarining bir qismi hisoblanadi.

Eslatib o‘tamiz, avvalroq Xitoy ulkan lazer yordamida yulduzlar energiyasini yaratmoqchi ekanligi haqida yozgan edik.