Bahodir Qurbonov Oʻzbekiston futbol assotsiatsiyasi prezidenti etib saylandi

Bahodir Qurbonov O‘zbekiston futbol assotsiatsiyasi prezidenti etib saylandi. Bu haqda assotsiatsiya matbuot xizmati xabar qildi.

Saylov Assotsiatsiya Saylov kodeksi va Ustaviga muvofiq oʻtkazildi. Assotsiatsiya Ustavining 30-moddasi 4-bandiga binoan, Qurbonov nomzodi delegatlar tomonidan ilgari surildi va rasman prezident etib tasdiqlandi.

Eslatib oʻtamiz, avvalgi prezident Abdusalom Azizov yanvar oyida lavozimidan ketgandi. Shu vaqtgacha prezidentlik vazifasini OʻFA birinchi vitse-prezidenti Ravshan Ermatov bajarib kelayotgandi.

Ma’lumot uchun, u 2019-yildan 2025-yil yanvar oyigacha O‘zbekiston mudofaa vaziri sifatida faoliyat yuritgan. Harbiy xizmatni 1987 – 1989-yillarda o‘tab, 1990-yilda IIV Oliy tergov maktabiga, 1992-yilda esa IIV Oliy maktabiga o‘qishga kirgan.

Qurbonov 2002 – 2008-yillarda turli hududiy IIBlarda rahbarlik qilgan. 2013 – 2015-yillarda ichki ishlar vaziri o‘rinbosari, 2015-yilda Toshkent shahar IIBB boshlig‘i etib tayinlangan. 2017-yilda general-mayor, 2021-yilda esa general-leytenant unvoniga sazovor bo‘lgan.

Avvalroq Kursiv Uzbekistan futzal federatsiyasi tashkil etilgani haqida xabar bergan edi.